Ministr zamiežnych spraŭ Vialikabrytanii pryznaŭ prava Ukrainy rabić dyviersii na terytoryi Rasii
Ministr zamiežnych spraŭ Vialikabrytanii Džejms Klevierli zajaviŭ, što Ukraina maje zakonnaje prava abaraniacca i moža «vykarystoŭvać siłu pa-za svaimi miežami». Pra heta paviedamlaje «Jeŭrapiejskaja praŭda» sa spasyłkaj na Sky News.
Džejms Klevierli (sprava) padčas sustrečy z Uładzimiram Zialenskim u Kijevie vosieńniu 2022 hoda. Fota: James Cleverly / Twitter
Adkazvajučy na pytańnie pra siońniašniuju ataku bieśpiłotnikaŭ na Maskvu i pra toje, ci maje Ukraina prava atakavać rasijskuju terytoryju, Klevierli skazaŭ, što nie budzie rabić zdahadak pra sutnaść ataki. Adnak jon dadaŭ, što Ukraina maje «zakonnaje prava abaraniać siabie».
«Jany majuć zakonnaje prava rabić heta ŭ svaich miežach, ale taksama majuć prava vykarystoŭvać siłu pa-za imi, kab padarvać zdolnaść Rasii nakiroŭvać siłu na samu Ukrainu», — adznačyŭ brytanski ministr.
Pa słovach Klevierli, «lehitymnyja vajskovyja celi» pa-za miežami Ukrainy — toje častka jaje samaabarony. «My pavinny heta pryznać», — padkreśliŭ jon.
Ranicaj 30 maja, jak paviedamlali rasijskija miedyja, ad 25 da 32 bieśpiłotnikaŭ atakavali Maskvu. U vyniku ataki byli paškodžanyja prynamsi dva šmatpaviarchovyja damy. Paviedamlajecca, što bolšaść dronaŭ źbili na padlocie da rasijskaj stalicy, u tym liku adzin nibyta niedaloka ad rezidencyi Uładzimira Pucina.
Čytajcie taksama:
Pucin u kursie, ale rabić zajavy nakont maštabnaj ataki dronaŭ na Maskvu nie budzie — Piaskoŭ
MUS Rasii abviaściła ŭ vyšuk hałoŭnakamandujučaha USU Valeryja Załužnaha
