Na astudžeńnie siervieraŭ ChatGPT treba stolki ž vady, kolki i na astudžeńnie jadziernaha reaktara — daśledavańnie
Navukoŭcy zmahli paličyć dakładny abjom vady, jaki byŭ nieabchodny dla navučańnia štučnaha intelektu ChatGPT i padobnych da jaho.
Fota: «Naša Niva»
Na navučańnie niejrasietki ChatGPT byŭ zatračany abjom vady, jaki zvyčajna vykarystoŭvajecca dla astudžeńnia jadziernaha reaktara. Pra heta 10 maja napisała vydańnie Gizmodo sa spasyłkaj na daśledavańnie navukoŭcaŭ z Kalifarnijskaha i Techaskaha ŭniviersitetaŭ ZŠA.
Pa infarmacyi navukoŭcaŭ, na navučańnie sistemy ChatGPT-3 (heta ŭžo sastarełaja viersija) spatrebiłasia 700 tysiač litraŭ vady — mienavita stolki było vydatkavana na astudžeńnie siervieraŭ kampanii OpenAI padčas stvareńnia hetaj viersii.
Heta značyć, što tolki za adzin sieans znosin sa štučnym intelektam źniščajecca adna litrovaja butelka vady. Pry hetym bolš novaja madel ChatGPT-4 moža spažyvać jašče bolš.
«Jak nam paviedamiła karparacyja Microsoft, dla treniroŭki ChatGPT-3 vykarystoŭvaŭsia supierkampjutar z 10 tysiačami videakart i 285 tysiačami pracesarnych jadraŭ, jakija vypracoŭvajuć hihanckuju kolkaść enierhii, a sierviery pry hetym mocna nahravajucca. Tamu dla astudžeńnia i padtrymańnia stabilnaj pracy takich vielizarnych mahutnaściaŭ patrabujucca takija ž vializnyja abjomy vady, što možna supastavić ź jomistaściu adnoj achaładžalnaj viežy na zvyčajnaj AES», — pišuć u svaim daśledavańni navukoŭcy.
Pa ich słovach, taki abjom vady zabiaśpiečvaje aptymalnuju tempieraturu ŭ sierviernych data-centrach (u kampanii OpenAI ich 14), a mienavita ad 10 da 26 hradusaŭ Celsija. Pry hetym na vypracoŭku kožnaj kiłavat/hadziny enierhii dla pracy štučnaha intelektu patrabujecca prykładna 5 litraŭ vyklučna čystaj presnaj vady.
Hety fakt asabliva pałochaje navukoŭcaŭ, bo z ulikam hłabalnaha paciapleńnia i ŭsio bolšaj papularnaści ChatGPT i inšych padobnych da jaho niejrasietak (jakija zatračvajuć jak minimum takuju ž kolkaść vady na navučańnie) heta moža stać surjoznaj prablemaj dla śvietu va ŭmovach budučych kryzisaŭ praz deficyt presnaj vady.
Tamu kampanijam-raspracoŭnikam štučnaha intelektu nieabchodna zadumacca ab udaskanaleńni svaich technałohij i padychodaŭ da spažyvańnia vady, kab zabiaśpiečyć biaśpieku nie tolki ličbavaha, ale i realnaha śvietu, ličać daśledčyki.
Nahadajem, što raniej miedyja zmahli vyśvietlić, kolki kaštuje adzin dzień pracy ChatGPT.
Čytajcie taksama:
Štučny intelekt stvaryŭ klip na kultavuju biełaruskuju pieśniu VIDEA
