«Heta mišeń dla ŭdaru ŭ adkaz». Cichanoŭskaja vykazałasia z nahody płanaŭ raźmiaścić jadziernuju zbroju ŭ Biełarusi
Śviatłana Cichanoŭskaja zapisała zvarot z nahody padpisańnia dakumientaŭ ab raźmiaščeńni jadziernaj zbroi ŭ Biełarusi. Łukašenka, nahadajem, užo zajaviŭ, što pačałosia pieramiaščeńnie ŭ Biełaruś jadziernych bojeprypasaŭ.
Śviatłana Cichanoŭskaja. Skryn videazvarotu
«Jašče dva miesiacy tamu dyktatary zajaŭlali tolki pra namier raźmiaścić u Biełarusi rasijskuju jadziernuju zbroju — a ŭžo siońnia jany padpisali pra heta dakumienty.
Jadziernaja zbroja — nijaki nie «parason», jaki abaronić ad niebiaśpieki. Heta ŭ pieršuju čarhu mišeń, cel dla ŭdaru ŭ adkaz. Heta naŭprost pahroza zdaroŭju i žyćciam biełarusaŭ. Biełarusaŭ, jakija suprać raźmiaščeńnia jadziernaj zbroi ŭ svajoj krainie. Ale dyktatary ž nie pytalisia ich mierkavańnia», — kaža ŭ zvarocie Śviatłana Cichanoŭskaja.
Raźmiaščeńnie jadziernaj zbroi ŭ našaj krainie ŭzmocnić i biez taho vielizarny kantrol Rasii nad Biełaruśsiu, padkreślivaje lidarka demakratyčnych siłaŭ.
«Hetu zbroju składana budzie vyvieści, jana moža stać pradmietam handlu i ahresii z boku Rasii. Łukašenka heta razumieje, ale jamu ŭsio roŭna, što budzie z našaj krainaj u budučyni. Nastupstvy hetaha buduć hadami razhrabać biełarusy.
U 1990 hadach my z vami zrabili svoj vybar, admoviŭšysia ad jadziernaj zbroi i vyvieŭšy jaje z našaj krainy — bieź jakich-niebudź umoŭ. Tamu što biełarusy vyvučyli ŭroki historyi i nie chočuć druhoha Čarnobyla na svajoj ziamli. My z vami jak nichto viedajem canu miru i biaśpieki. Užo ciapier mir i biaśpieka kožnaha z nas pad pahrozaj».
Cichanoŭskaja dadaje, što hałoŭnaja meta demakratyčnych siłaŭ — całkam pazbavić Biełaruś ad rasijskaha ŭpłyvu.
«Vyjści z ADKB i Sajuznaj dziaržavy — nam nie patrebnyja sajuzy, jakija rujnujuć našu krainu, supiarečać našym nacyjanalnym intaresam i staviać pad pahrozu našy žyćci. Biełaruś pavinna pazbavicca ad takich sajuzaŭ i budavać novyja, dzie šanujecca žyćcio, svaboda i pravy kožnaha čałavieka. My pavinny damahčysia vyvadu rasijskich vojskaŭ i zakryćcia ich vajskovych abjektaŭ na terytoryi svajoj krainy», — adznačyła jana.
Čytajcie taksama:
Łukašenka zajaviŭ, što pačałosia pieramiaščeńnie ŭ Biełaruś jadziernych bojeprypasaŭ
to bok faktyčna zajaviła, što nie treba joj mirnaje nieba nad Biełaruśsiu. sama pry hetym znachodziačysia ŭ biaśpiecy