Na konkursie biełaruskich kampanij za miažoj pieramahli biznes bratoŭ Šyłaŭ i krama kvietak. Chto jašče?
Asacyjacyja biełaruskaha biznesu za miažoj (AVVA) uznaharodziła pieramožcaŭ konkursu Free Belarus Business Award.
Fota: AVVA
11 maja adbyłosia ŭračystaje abjaŭleńnie vynikaŭ konkursu biełaruskaha biznesu ŭ zale kacirovak Varšaŭskaj fondavaj biržy. Free Belarus Business Award byŭ arhanizavany AVVA pry finansavańni Jeŭrapiejskaha sajuza.
Heta było pieršaje mierapryjemstva z zapłanavanaha cykła — u 2023 i 2024 adbudziecca jašče try takija konkursy, a ŭvohule prajekt imkniecca stać vialikim nacyjanalnym.
Arhanizatary atrymali zajaŭki ad bolš čym 70 pradstaŭnikoŭ biznesu ź biełaruskimi karaniami z 12 krain, z roznych śfier i roznych maštabaŭ. Ahulny pryzavy fond pieršaha konkursu skłaŭ 25 tysiač jeŭra — piać pieramožcaŭ atrymała siertyfikaty na 5000 jeŭra kožny. Jašče adzin pieramožca — u partniorskaj naminacyi — atrymaŭ uznaharodu ad Paŭła Libiera.
Pieramahli nastupnyja kampanii:
- u katehoryi «Małady biznes» — płatforma telemiedycyny dla dziaciej z ADHD PigPug Health;
- u naminacyi «Indyvidualny biznes» — studyja animacyi KAPI animation GbR;
- u naminacyi «Patencyjał maštabavanaści» pieramožcam stała krama kvietak ROSES.EE;
- «Mižnarodnyja ambicyi» — klininhavaja płatforma Cleanwhale;
- «Reprezientacyja Biełarusi» — kaviarnia i art-placoŭka Klubokawiarnia MY;
- śpiecyjalny pryz ad Paŭła Libiera atrymaŭ kaśmietałahičny servis Atelier Royal.
Akramia Jeŭrapiejskaha sajuza, partnioram vystupiła i Varšaŭskaja fondavaja birža. A siarod čalcoŭ žury — mižnarodnyja ekśpierty ŭ śfiery inviestycyj, ekanamičnaha raźvićcia i inavacyj.
Padčas konkursu ŭdzielniki atrymali mahčymaść prajści kurs pa asnovach publičnych vystupaŭ.
AVVA taksama adznačaje, što navat toj biznes, jaki nie pieramoh, usio roŭna moža atrymać stałuju padtrymku, a taksama raźličvać na kansultacyjnuju, infarmacyjnuju i inšuju padtrymku, dałučyŭšysia da AVVA.
