MZS Ukrainy asudziła ŭdzieł zamiežnych lidaraŭ u Paradzie ŭ Maskvie. Usich, akramia Łukašenki
Źniešniepalityčnaje viedamstva Ukrainy vystupiła z asudžeńniem udziełu kiraŭnikoŭ Armienii, Kazachstana, Kyrhyzstana, Tadžykistana, Turkmienistana i Uźbiekistana va ŭračystych mierapryjemstvach 9 maja ŭ Maskvie. U zajavie ničoha nie skazana pra Alaksandra Łukašenku, jaki taksama byŭ razam ź imi.
Prezidenty Uźbiekistana Šaŭkat Mirzijojeŭ, Kazachstana Kasym-Žamart Takajeŭ, Rasii Uładzimir Pucin i Kyrhyzstana Sadyr Žaparaŭ.
U zajavie nahadali pra toje, što ŭ noč na 9 maja Rasija vypuściła 25 rakiet pa Ukrainie i 15 — pa Kijevie.
«Razhladajem udzieł lidaraŭ nazvanych zamiežnych dziaržaŭ u publičnym mierapryjemstvie naraŭnie z vajennym złačyncam, jaki vychvalajecca raźviazvańniem vajny ŭ Jeŭropie ŭ maštabach, jakija nie viedali z časoŭ Druhoj suśvietnaj vajny, jak amaralny i niedružalubny krok u dačynieńni da Ukrainy, prajavu pahardy da ŭkrainskaha naroda, jaki zmahajecca za svajo vyžyvańnie i svabodu», — havorycca ŭ zajavie.
Taksama MZS Ukrainy zajaviła, što narody Centralnaj Azii i Kaŭkaza nie zasłuhoŭvajuć losu być vykarystanymi Kramlom dla ŭdziełu ŭ falšyvym dziejstvie, jakoje nie maje ničoha ahulnaha z podźviham pieramožcaŭ nad nacyzmam.
Adznačym, što ŭ zajavie ničoha nie havorycca pra ŭdzieł Alaksandra Łukašenki ŭ paradzie na Krasnaj płoščy.
