Rasijski dron atakavaŭ aeraport Čarnabajeŭki, kali tam raźminiravali bojeprypasy. Dzieviać čałaviek zahinuli
U vyniku napadu rasijskaha bieśpiłotnika na aeraport u pasiołku Čarnabajeŭka Chiersonskaj vobłaści dzieviać čałaviek zahinuli, paviedamlaje vydańnie «Strana.ua» sa spasyłkaj na krynicy ŭ pravaachoŭnych orhanach.
Pa danych vydańnia, dniom 6 maja rasijskija vajskoŭcy skinuli ź bieśpiłotnika «vybuchny pradmiet» na piratechničnuju hrupu, jakaja zajmałasia abiasškodžvańniem bojeprypasaŭ na sartavalnaj placoŭcy.
Napiaredadni kiraŭnik Dziaržaŭnaj słužby Ukrainy pa nadzvyčajnych situacyjach (DSNS) Ukrainy Siarhiej Kruk paviedamlaŭ, što padčas abstrełu ŭ Čarnabajeŭcy zahinuła šeść supracoŭnikaŭ DSNS, a jašče dva čałavieki, u tym liku žančyna-fielčar, špitalizavany.
Pavodle apošnich danych, jakija pryvodziać krynicy «Strana.ua», zahinuli šeść supracoŭnikaŭ DSNS i try rabotniki pamiežnaj słužby, jašče try supracoŭniki DSNS paranienyja.
Pasiołak Čarnabajeŭka byŭ zachopleny rasijanami 27 lutaha 2022 hoda. Na praciahu niekalkich miesiacaŭ USU nanosili ŭdary pa aeradromie i źniščali ŭzbrajeńnie armii RF, što naradziła miemy pra Čarnabajeŭku. 11 listapada Čarnabajeŭka viarnułasia pad kantrol Ukrainy.