Hraviuru Braŭna i Hohienbierha z vyjavaj Hrodna ad 1575 h. vystavili na internet-aŭkcyjon
Vydadzienaja ŭ Kiolnie ŭ zborniku vidaŭ, płanaŭ i praśpiektaŭ najvažniejšych jeŭrapiejskich haradoŭ «Civitates Orbis Terrarum» hraviura pakul nie znajšła haspadara.
Vydadzienaja ŭ Kiolnie ŭ zborniku vidaŭ, płanaŭ i praśpiektaŭ najvažniejšych jeŭrapiejskich haradoŭ «Civitates Orbis Terrarum» hraviura pakul nie znajšła haspadara.
Na internet-aŭkcyjonie z 13 kastryčnika pa 12 listapada 2009 hodu vystaŭlałasia hraviura Braŭna i Hohienbierha z vyjavaj Hrodna. Pakul što niaŭdała. Pavodle pradaŭca hraviury, jana była ŭziataja z druhoha tomu (1575 h.) knihi «Civitates Orbis Terrarum», vydadzienaj Braŭnam i Hohienbierham u Kiolnie — znakamitaha zboru bolš čym 500 vidaŭ, płanaŭ i praśpiektaŭ najvažniejšych jeŭrapiejskich haradoŭ. Vyjava pamieram 485 × 305 mm + pali źjaŭlajecca sproščanaj kopijaj hraviury Ciundta 1568 h. Na hraviury namalavany panaramny vid Hrodna sa scenaj pryjomu maskoŭskaha pasła na piarednim płanie. Startavaja cana składała 2 miljony 700 tysiač rubloŭ, blic-cana, pa jakoj łot addavaŭsia biez tarhoŭ — 2 miljony 900 tysiač rubloŭ. Nabytaja hraviura nibyta ŭ adnaho ź niamieckich aŭkcyjonnych damoŭ.
Vyklikajuć cikavaść umovy dastaŭki i apłaty łota. Tak, atrymać hraviuru pakupnik moža tolki pa pošcie. Pieradača z ruk u ruki asabista vyklučanaja, jak i vysyłka za miažu. Raźlik najaŭnymi asabista z pradaŭcom pry atrymańni łota vyklučany, jak i bieznajaŭny raźlik, i poŭnaja pieradapłata da adpraŭki łota pa pošcie, i nakładzieny płaciež pry atrymańni łota na pošcie.
Prodaž hraviuraŭ z vyjavaj Hrodna časoŭ epochi Adradžeńnia staŭ druhim pa liku za apošnija hady. Letam 2008 h. u Varšavie na aŭkcyjonie antykvarnych pradmietaŭ była pradadzienaja za $44000 hraviura Ciundta 1568 h. z vyjavaj Hrodna. Toj łot apynuŭsia nie pa kišeni dla hrodzienskaha historyka-archieałahičnaha muzieju, hraviuru nabyŭ polski kalekcyjanier. Hetym razam muziej nie prymaŭ udziełu ŭ tarhach. «My majem čatyry kopii hraviuraŭ Braŭna z vyjavaj našaha horadu», — patłumačyŭ dyrektar historyka-archieałahičnaha muzieju Jury Kiturka. Pa jaho słovach, pryznačanaja na aŭkcyjonie cana vyšejpamianionaj hraviury Braŭna i Hohienbierha całkam adpaviadaje rečaisnaści.
