Puciłu acanili najdaražej. Jakija zavočnyja prysudy vynosili biełarusam
Siońnia, aproč Ramana Pratasieviča, vynieśli prysudy jašče dvaim redaktaram Nexta, jakija za miažoj. Im dali bolej, čym Łatušku i Cichanoŭskaj. Zhadvajem, jakija zavočnyja prysudy ŭžo vynosili biełaruskija ŭłady.
Instytut śpiecyjalnaj vytvorčaści (ci paprostu zavočnyja sudy) u Biełarusi ŭviali ź lipienia 2022 hoda. Zroblena heta było, kab pieraśledavać palityčnych apanientaŭ, što znachodziacca za miažoj. Śpis artykułaŭ, pa jakich mohuć sudzić zavočna, unušalny i ŭklučaje takija artykuły, jak akt teraryzmu, hienacyd, najomnictva, zdrada dziaržavie, dyviersija, stvareńnie ekstremisckaha farmiravańnia albo ŭdzieł u im, masavyja biesparadki, zakliki da sankcyj.
Najbolšyja zavočnyja prysudy na siońnia — u redaktaraŭ Nexta Ściapana Puciły i Jana Rudzika (užo byłoha redaktara prajekta). Pavodle dziaržaŭnych ŚMI, ich abvinavačvali nie mienš čym u 1586 złačynstvach. Puciłu inkryminavali 11 artykułaŭ KK, Rudziku — 10.
Z palitykaŭ u emihracyi samy vialiki vyrak vynieśli Paŭłu Łatušku — 18 hadoŭ. Na hod mieniej dali palityku Valeru Capkału, jaki byŭ adnym z pretendentaŭ na post prezidenta na vybarach u 2020-m. Siarod abvinavačańniaŭ, jakija vystavili Capkału, jaki kaliści byŭ kiraŭnikom PVT, — złoŭžyvańnie słužbovymi paŭnamoctvami i atrymańnie chabaru ŭ asabliva bujnym pamiery.
Śviatłanie Cichanoŭskaj prysudzili zavočna 15 hadoŭ. Jaje, jak i Łatušku, pryznali vinavataj u zmovie z metaj zachopu ŭłady, zakliku da zachopu ŭłady, raspalvańni sacyjalnaj varažniečy i stvareńni ekstremisckaha farmavańnia.
Razam ź Cichanoŭskaj i Łatuškam pa spravie Kaardynacyjnaj rady prachodzili taksama były rabotnik MTZ Siarhiej Dyleŭski, palityk Volha Kavalkova i byłaja kiraŭnica štaba Cichanoŭskaj Maryja Maroz. Usim trom dali pa 12 hadoŭ.
Praz zavočnyja sudy prajšli stvaralniki Biełaruskaha fondu spartovaj salidarnaści — Alaksandra Hierasimienia (jakaja paźniej syšła z fondu) i Alaksandr Apiejkin. Ich abvinavacili ŭ tym, što jany stvaryli spartovy fond i raspaŭsiudžvali «zahadzia łžyvyja źviestki i vydumki pra padziei, jakija adbyvalisia ŭ krainie, pra chod i vyniki vybarčaj kampanii 2020 hoda».
Śpiecyjalnaja vytvorčaść była i pa «spravie ČKB» — tych, chto byŭ datyčny da stvareńnia i administravańnia telehram-kanała «Čornaja kniha Biełarusi», dzie deananimizavali siłavikoŭ. Pa spravie prachodziła piać čałaviek — miedyjamieniedžar Dźmitryj Navoša, Janina Sazanovič, Daniła Bahdanovič, Valeryja Zaniamonskaja i Volha Vysockaja. Usim im dali pa 12 hadoŭ.
Zavočna sudzili byłoha pasła ŭ Arhiencinie Uładzimira Astapienku, jaki ciapier kiruje misijaj Abjadnanaha pierachodnaha kabinieta ŭ Brusieli. Jaho abvinavacili ŭ namiery zavałodać majomaściu ŭ bujnym pamiery, budučy słužbovaj asobaj. Astapienku zavočna prysudzili 5 hadoŭ pazbaŭleńnia voli. A paśla niečakana amnistavali na adzin hod — «u suviazi z Dniom narodnaha adzinstva».
Čytajcie taksama:
Ramanu Pratasieviču dali 8 hadoŭ kałonii. Ale pakul pakinuli pad chatnim aryštam
My atrymali dziesiać vypadkovych akaŭntaŭ sa «źlivu» ČKB. Ci možna vyličyć ich uładalnikaŭ?
