Rasija zastajecca bieź śpiecnaza. Ahulnyja straty nabližajucca da 50 tysiač zabitymi
Na asnovie adkrytych krynic Bi-bi-si ŭdałosia ŭstanavić imiony 21 700 rasijskich vajskoŭcaŭ, jakija zahinuli na vajnie va Ukrainie. Tempy pryrostu strat praciahvajuć zastavacca vysokimi, pryčym nie tolki ŭ atradach, składzienych sa źniavolenych, ale i ŭ śpiecyjalizavanych padraździaleńniach rasijskaj armii.
Fota: Rashvardyja
Ruskaja słužba Bi-bi-si sumiesna z vydańniem «Miedyjazona» i kamandaj vałancioraŭ ustanaviła, što za 14 miesiacaŭ uvarvańnia rasijskija siły stracili, prynamsi, 3401 elitnaha śpiecyjalista, siarod jakich bajcy śpiecnaza HRU i Rashvardyi, desantniki, marskija piechacincy i vajskovyja piłoty. Na ich padrychtoŭku syšli hady namahańniaŭ i miljony dalaraŭ.
Havorka idzie tolki pra tyja źviestki, jakija možna znajści i pravieryć pa adkrytych krynicach, to-bok realnaja kolkaść strat biassprečna jašče bolšaja.
Za apošnija dva tydni ŭdałosia ŭstanavić imiony 1249 zahinułych (prynamsi, 54 ź ich słužyli ŭ elitnych padraździaleńniach). Heta istotna bolš, čym siarednija pakazčyki 2022 hoda. U pieršyja 12 miesiacaŭ vajny rasijskija krynicy kožny tydzień paviedamlali prykładna pra 250—300 zahinułych.
Tracina ŭsich hetych strat prypadaje na tych, chto da pačatku ŭvarvańnia nie byŭ źviazany z armijaj: dobraachvotnikaŭ, mabilizavanych, źniavolenych i niadaŭna nabranych supracoŭnikaŭ PVK. Miarkujučy pa adkrytych danych, najbolšyja straty ŭ apošnija miesiacy pa-raniejšamu niasuć źniavolenyja, jakija vajujuć u rajonie Bachmuta, šmat strat i ŭ atradach mabilizavanych.
Śpis moža ŭtrymlivać, prynamsi, u dva razy mienš imionaŭ zahinułych, čym nasamreč pachavana ŭ Rasii. Da takoj vysnovy žurnalisty pryjšli, vyvučajučy abstanoŭku na mohiłkach u bolš čym 65 rasijskich nasielenych punktach na praciahu apošnich 14 miesiacaŭ.
Takim čynam, pavodle najbolš kansiervatyŭnaj acenki padčas uvarvańnia va Ukrainu Rasija mahła stracić 43 400 čałaviek zahinułymi.
Ahulnyja biezzvarotnyja straty Rasii (heta značyć kolkaść tych, chto vybyŭ sa stroju z pryčyny ranieńnia abo śmierci ci prapaŭ bieź viestak) mohuć składać, prynamsi, 195 000 čałaviek.
Hetaja ličba atrymana na asnovie nazirańniaŭ Centra vajskova-marskoha analizu ZŠA, zhodna ź jakimi na kožnaha zahinułaha rasijskaha vajskoŭca padčas vajny va Ukrainie prypadaje ŭ siarednim blizu troch z pałovaj paranienych.
U hetuju ličbu nie ŭvachodziać tyja, chto vajavaŭ na baku Rasii ŭ składzie «narodnych milicyj» Daniecka i Łuhanska. Akramia taho, niama mahčymaści ŭstanavić navat prykładna kolkaść vajskoŭcaŭ, źnikłych bieź viestak.
Čytać taksama:
ZŠA: Sa śniežnia na vajnie va Ukrainie zahinuli 20 tysiač rasijanaŭ, mnohija ź ich — u Bachmucie
