Biełaruskaja rada kultury zapuskaje čarhovy mahistrat
Biełaruskaja rada kultury zapuskaje mahistrat «Spadčyna-Urocłaŭ». Paśla paśpiachovaha hurtavańnia bolš jak 300 čałaviek vakoł adnaŭleńnia vydaviectva Andreja Januškieviča «Knihaŭka», BRK prapanuje biełarusam abjadnacca ŭ supolnaść, jakaja ciaham dzieviaci miesiacaŭ budzie padtrymlivać padletkavy kłub raźvićcia i kultury Spadčyna va Urocłavie.
Kłub stvaryli try miesiacy tamu, kab dzieci biełaruskich emihrantaŭ vychoŭvalisia na biełaruskaj movie i ŭ biełaruskim kantekście. Za hety čas jon sabraŭ 55 udzielnikaŭ 8—16 hadoŭ, čaćviarych kurataraŭ i ŭvioŭ u pracu 7 vidaŭ dziejnaści. Pavodle arhanizataraŭ, dziakujučy supolnym zaniatkam u Spadčyna dzieci sapraŭdy pierachodziać na biełaruskuju movu znosinaŭ.
Kłub maje zapyt na toje, kab pašyryć kolkaść udzielnikaŭ da 70 i zaprasić jašče dvuch kurataraŭ, ale na heta pakul nie staje resursaŭ.
«Biełaruskaja mova, historyja i tradycyi stajać u Spadčyna na pieršym miescy, — kaža zasnavalnica kłuba Nastaśsia Sasykbajeva. — My abaviazanyja dać ich našym dzieciam, jakija akazalisia ŭ vymušanaj emihracyi. Dzieciam taksama balić za Biełaruś, nie varta dumać, što jany ničoha nie razumiejuć. Bolšaść z udzielnikaŭ našaha kłuba razvažaje, što atrymaje adukacyju i dośvied za miažoj i vierniecca ŭ Biełaruś budavać niezaležnuju demakratyčnuju krainu. A dla hetaha treba viedać svaje movu i historyju — va Urocłavie jany mohuć atrymać heta tolki ŭ adnym miescy».
Materyjały dla zaniatkaŭ rychtujucca vyklučna na biełaruskaj movie, kuratary razmaŭlajuć ź dziećmi taksama tolki pa-biełarusku. U kłubie dzieci razam robiać chatnija zadańni, naviedvajuć teatralnyja zaniatki i majstar-kłasy pobytavych tancaŭ, chodziać na ekskursii, vyvučajuć historyju Biełarusi, čytajuć biełaruskija litaraturnyja tvory, hladziać filmy i multfilmy na biełaruskaj movie, sprabujuć roznyja vidy hulniaŭ, razmoŭnyja i dyskusijnyja kłuby. Na leta arhanizatary płanujuć imprezy na adkrytym pavietry: pikniki, turystyčnyja źloty, spartakijady, rovarnyja marafony dy inšyja spartovyja zabavy.
«Kłub Spadčyna zusim małady, ale jaho stvaralniki majuć dośvied pracy ź dziećmi, jany dakładna viedajuć, što treba rabić, i samaje hałoŭnaje — jany zachoplenyja svajoj spravaju, — tłumačyć vybar inicyjatyvy kiraŭnik prajektu «Biełaruskija mahistraty» Cimafiej Akudovič. — Užo ciapier dasiahnieńni kłubu ŭražvajuć: bolš za 50 dziaciej, roznafarmatnyja imprezy, aktyŭnaja supraca ź inšymi arhanizacyjami. Padtrymka biełaruskaj hramadskaści daść hetaj inicyjatyvie šaniec vyraści ŭ vialikuju dziejsnuju prastoru dla vychavańnia i tvorčaha rostu biełaruskich dziaciej u Vrocłavie».
Kab dapamahčy Spadčyna dasiahnuć žadanaha maštabu, treba sabrać nie mienš za 100 čalcoŭ supolnaści, hatovych štomiesiac achviaroŭvać nievialikija sumy hrošaj. Praciahłaść — 9 miesiacaŭ.
Dałučycca da mahistrata prosta: dastatkova padpisacca na adzin z prapanavanych taryfaŭ — 45 złotych (≈ $ 10), 90 złotych (≈ $ 20) albo 140 złotych ($ ≈ 30) na vybar udzielnika praz płaciežnuju sistemu Stripe. Možna taksama zrabić adnarazovaje achviaravańnie.
Čalec mahistrata atrymlivaje:
elektronny siertyfikat udzielnika mahistrata (pry ŭmovie ŭdziełu ciaham minimum 8 miesiacaŭ) z paznačeńniem achviaravanaj sumy;
spravazdačy pra dziejnaść kłuba;
mahčymaść brać udzieł u štomiesiačnych strymach z zasnavalnikami kłuba i abmiarkoŭvać naviny;
tvorčyja videapadarunki ad dziaciej, jakija zajmajucca ŭ kłubie.
Spadčyna moža zrabicca prykładam dla inšych haradoŭ ź vialikaj biełaruskaj dyjasparaj u spravie adkryćcia biełarusaaryjentavanych prastor dla dziaciej. Zasnavalniki kłuba, paśla taho jak ich inicyjatyva stanie na nohi, hatovyja dzialicca napracoŭkami i dośviedam z kalehami ź inšych haradoŭ albo sami adkryvać tam anałahičnyja prastory.
Spadčyna — druhaja ŭ prajekcie «Biełaruskija mahistraty» Biełaruskaj rady kultury. Mahistratam nazyvacca supołka achviaradaŭcaŭ, jakija damaŭlajucca ciaham kankretnaha pieryjadu vyznačanaj sumaj hrošaj padtrymlivać pierśpiektyŭny prajekt biełaruskaj spravy albo dapamahać raźviazańniu peŭnaj prablemy.
Čytajcie taksama:
Mahistrat «Knihaŭka»: Rada kultury zapuskaje pieršy prajekt «biełaruskaha Patreona»
U mahistracie «Knihaŭka» ŭžo bolš za 300 udzielnikaŭ. I da jaho možna dałučacca
