Ryhora Kastusiova ŭ kałonii pazbavili spatkańniaŭ
Krychu bolš za dva hady znachodzicca za kratami staršynia Partyi BNF Ryhor Kastusioŭ. Na hetym tydni jamu spoŭniłasia 66 hod…
Palityk byŭ zatrymany 12 krasavika 2021 hoda ŭ Škłovie pa spravie ab «zachopie ŭłady». Jaho abvinavacili pavodle art. 357 KK — «zmova ci inšyja dziejańni, ździejśnienyja z metaj zachopu dziaržaŭnaj ułady».
5 vieraśnia 2022 hoda sud pryznaŭ Ryhora Kastusiova vinavatym i prysudziŭ jamu 10 hadoŭ źniavoleńnia ŭ kałonii va ŭmovach uzmocnienaha režymu.
Naprykancy minułaha hoda Ministerstva ŭnutranych spraŭ dadało palityka ŭ śpis asob, «jakija majuć dačynieńnie da ekstremisckaj dziejnaści».
Adbyvaje pakarańnie Ryhor Kastusioŭ u papraŭčaj kałonii №22 u Ivacevičach, jakaja viadoma pad nazvaj «Voŭčyja nory».
«U SIZA ŭ Ryhora Kastusiova abvastrylisia prablemy sa zdaroŭjem — u pryvatnaści, vyjaviłasia ankałahičnaje zachvorvańnie, — raspaviali «Narodnaj Voli» paplečniki i siabry palityka. — Nastojlivyja zvaroty advakataŭ z prośbaj zabiaśpiečyć źniavolenamu naležnaje miedycynskaje abśledavańnie nie majuć plonu da hetaha času.
Ź niezrazumiełych pryčyn Ryhora pazbavili spatkańniaŭ sa svajakami — apošniaje zdaryłasia ŭ SIZA KDB adrazu paśla suda. Akramia taho, jamu istotna źmienšyli sumu atavarki ŭ miascovaj kramie.
Kali ź izalataraŭ listy da žonki dachodzili biez mocnych zatrymak, to ciapier z hetym prablemy. Niama dakładnych źviestak nakont taho, ci nie namahajucca jaho pryciahvać da łahiernych rabot — asabliva z ulikam piensijonnaha ŭzrostu i miedycynskich abmiežavańniaŭ.
Hetak ža niama peŭnaści adnosna fizičnaha stanu viaźnia. Nibyta ŭžo z kałonii pavinny byli adpravić na abśledavańnie ŭ lakarniu, adnak, jak vynikaje z papiarednich sprobaŭ, vyniki ahladu administracyja papraŭčaj ustanovy nikomu nie paviedamlaje».
Vadzim Sarančukoŭ, jaki vykonvaje abaviazki kiraŭnika Partyi BNF, dadaje, što ni ŭ jaho, ni ŭ siabroŭ partyi taksama niama nijakich naŭprostavych kantaktaŭ z Ryhoram Kastusiovym.
«Listy, jakija dasyłajuć jamu paplečniki ŭ vialikaj kolkaści, jak my razumiejem, nie dachodziać, — kaža Vadzim Sarančukoŭ. — Tamu luboje atrymańnie infarmacyi z taho boku ci naadvarot, da jaho, vielmi abmiežavanaje.
Ale ŭ nas atrymlivajecca pieradavać leki. Abjektyŭnaj infarmacyi niama, tamu skazać, u jakim stanie jon znachodzicca, zaraz vielmi składana…».
Čytajcie taksama:
«Nastojvaju na poŭnaj nievinavataści». Ryhor Kastusioŭ napisaŭ Łukašenku adkryty list
«Voli ściah šče załunaje, kab svabodzie, praŭdzie być». Ryhor Kastusioŭ dasłaŭ vierš z-za krataŭ
