Abłava na zavodach «Naftan» i «Palimir» — dziesiać pracaŭnikoŭ aryštavanyja
Im pahražajuć kryminałkami i zvalnieńniem.
Źniešni vyhlad «Palimira». Fota: «Navapołack siońnia»
Pra abłavu na zavodach «Naftan» i «Palimir» nie pisałasia ŭ ŚMI, ale pra jaje stała viadoma z paviedamleńnia aficyjnaha zakrytaha kanała zavoda. Zatrymali dziesiać pracaŭnikoŭ zavodaŭ i ŭsim im prysudzili aryšt — ad 10 da 30 sutak, u asnoŭnym za reposty (pa artykule 19.11).
Skrynšot z aficyjnaha kanała zavoda «Naftan-Palimir pra hałoŭnaje»
U kanale pišuć, što zatrymanyja pracavać na zavodzie bolej nie buduć. «Amal dakładna hetyja ludzi buduć zvolnienyja sa svaich pradpryjemstvaŭ, bo aryšt nie źjaŭlajecca ŭvažlivaj pryčynaj dla adsutnaści na pracoŭnym miescy», — pišuć aŭtary kanała. A niekatorym pahražajuć kryminalnaj spravaj:
«Pravaachoŭnymi orhanami niekatorym z zatrymanych budzie dadzienaja dadatkovaja kryminalna-pravavaja acenka, bo ŭ ich dziejańniach uhledžvajucca prykmiety ŭčynieńnia złačynstvaŭ ekstremisckaj skiravanaści, pakarańnie za jakija praduhledžvaje adkaznaść u vyhladzie pazbaŭleńnia voli terminam da 12 hadoŭ», — śćviardžaje administracyja zavadskoha kanała.
Paśla hetaha administracyja pradpryjemstva, akramia maralizatarstva, zaklikaje pracaŭnikoŭ adpisacca ad «ekstremisckich» kanałaŭ, a taksama prahladzieć svaje sacyjalnyja sietki i sietki svajakoŭ na pradmiet najaŭnaści «čahości padazronaha».
«Sumniavajeciesia? Lepš vydalicie! Horš budzie, kali ŭsie zastanucca abyjakavymi i buduć spadziavacca tolki na ŭdaču», — padsumoŭvajuć aŭtary zavadskoha kanała.
Nahadajem, na «Palimiry» doŭhi čas pracavaŭ adzin ź fihurantaŭ spravy «Rabočaha ruchu» Alaksandr Kapšul. Heta nie pieršaja abłava na pradpryjemstvie.
«Naša Niva» — bastyjon biełaruščyny
PADTRYMAĆČytajcie taksama:
Tłumačym, jakim čynam siłaviki znachodziać karystalnikaŭ Telegram i jak hetaha paźbiehnuć
«Ludzi daviedzienyja da kropki». Zvolnienaja Volha Brycikava — pra stačku i nastroi na «Naftanie»
