Žychara Pinska asudzili za abrazy pradstaŭnikoŭ ułady i pa «narkatyčnym» artykule
U sudzie Pinskaha rajona i horada Pinska 10 krasavika ŭ zakrytym režymie vyniesieny prysud 40-hadovamu Alehu Stasiuku. Sudovy praces vioŭ sudździa Ihar Klimovič, dziaržabvinavaŭca — Illa Huzarevič, piša «Viasna».
Sud Pinskaha rajona
Na sudzie Stasiuk byŭ pad vartaj. Viadoma, što ŭ mužčyny dvoje niepaŭnaletnich dziaciej.
Mužčynu sudzili za internet-kamientaryi. Adnak, kali da Stasiuka pryjšli ź pieratrusam, doma ŭ jaho znajšli «abstalavańnie dla vyroščvańnia» kanoplaŭ, marychuanu, raśliny kanoplaŭ. Akramia taho, na kampjutary znajšli porna, na jakim Stasiuk, pa mierkavańni śledstva «niezakonna zarabiŭ nie mienš za 775$».
A kamientaryi ŭ sacyjalnych sietkach Aleh Stasiuk nibyta napisaŭ u telehramie ŭ mai 2021 hoda i sakaviku 2022 hoda. Jany tyčylisia hienprakurora Švieda, kiraŭnika KDK, ministra infarmacyi, dyrektara i namieśnika dyrektara DFR.
Takim čynam, Stasiuku vystavili abvinavačańni pa čatyroch kryminalnych artykułach: art. 369 KK (abraza pradstaŭnika ŭłady), č. 2 art. 343 KK (vyrab i raspaŭsiudžvańnie parnahrafičnych materyjałaŭ), č. 1 art. 329 KK (niezakonnyja pasieŭ i (abo) vyroščvańnie raślin albo hryboŭ, jakija źmiaščajuć narkatyčnyja srodki abo psichatropnyja rečyvy), č. 1 art. 328 KK (niezakonny abarot narkatyčnych srodkaŭ, psichatropnych rečyvaŭ, ich prekursoraŭ i anałahaŭ).
Sumarna pa ŭsich artykułach, šlacham častkovaha składańnia złačynstvaŭ, Stasiuku prysudzili čatyry hady kałonii va ŭmovach ahulnaha režymu i štraf u pamiery 200 bazavych vieličyń (7400 rubloŭ).
Pačynajuć sudzić vykładčyka Dźmitryja Jurtajeva. Jaho prymušali na kamieru čytać vieršy
Ramana Pratasieviča na sudzie abvinavacili ŭ kiravańni jašče adnym «ekstremisckim farmavańniem»
