U mitrapalita Anufryja i inšych ijerarchaŭ Ukrainskaj pravasłaŭnaj carkvy znajšli rasijskija pašparty
Mitrapalit Kijeŭski i ŭsioj Ukrainy Ukrainskaj pravasłaŭnaj carkvy Maskoŭskaha patryjarchatu Anufryj (Arest Bierazoŭski) i jašče bolš za 20 śviataroŭ Ukrainskaj pravasłaŭnaj carkvy Maskoŭskaha patryjarchatu majuć rasijskaje hramadzianstva, vynikaje z rasśledavańnia, praviedzienaha vydańniem «Ukrainskaja praŭda».
Mitrapalit Anufryj. Fota: pres-słužba UPC MP
Zhodna z infarmacyjaj, vyciahnutaj ź sistemy «Raspašpart», 20 sakavika 2002 hoda mitrapalit Anufryj atrymaŭ u Maskvie rasijski pašpart. Praz hod, 23 červienia 2003 hoda, jon atrymaŭ jašče i zamiežny pašpart hramadzianina Rasii.
Hetyja pašparty ŭ jaho byli nie pieršyja, bo ŭ 1998 hodzie śviataru ŭ Maskvie ŭžo vydavali zamiežny pašpart. A heta značyć, što rasijskaje hramadzianstva Anufryj mieŭ značna raniej, čym z 2002 hoda.
Archirej UPC MP i namieśnik Dziesiacinnaha manastyra ŭ Kijevie Hiedeon (Juryj Charon), akazvajecca, taksama maje rasijskaje hramadzianstva. Rasijski pašpart jon atrymaŭ u 2019 hodzie ŭ Maskvie, a ŭ 2020-m atrymaŭ cełyja dva zamiežnyja pašparty hramadzianina Rasii.
«Ukrainskaja praŭda» vyśvietliła taksama, što ŭ studzieni 2023 hoda, amal praz hod paśla poŭnamaštabnaha ŭvarvańnia rasijskaj armii va Ukrainu, Hiedeon pravodziŭ słužbu ŭ rasijskaj Kazani. U jaho malitvie byli i słovy ŭ padtrymku vojskaŭ RF i rasijskaha napadu na Ukrainu.
U śniežni 2022 hoda rasijski pašpart atrymaŭ taksama były mitrapalit Iziumski i Kupianski Jelisiej (Aleh Ivanoŭ). Paśla akupacyi Iziuma rasijskimi vojskami Jelisiej praciahnuŭ malicca za patryjarcha Kiryła i pačaŭ pracavać na akupacyjnuju ŭładu. U pryvatnaści, jon prymaŭ u siabie ŭ chramie pradstaŭnikoŭ akupacyjnaj administracyi Charkaŭskaj vobłaści. Paśla deakupacyi Iziuma Ivanoŭ źbieh u Biełharad, dzie i atrymaŭ rasijski pašpart.
Ciapier u redakcyi «Ukrainskaj praŭdy» jość paćvierdžanaja infarmacyja pra najaŭnaść rasijskich pašpartoŭ bolš čym u 20 śviataroŭ UPC MP. U najbližejšy čas vydańnie abiacaje apublikavać hetyja danyja na svaim sajcie.
Ciapier ža redakcyja pryvodzić tolki niekatoryja z proźviščaŭ vysokapastaŭlenych śviataroŭ UPC MP, jakija majuć rasijskaje hramadzianstva:
- mitrapalit Tulčynski i Bracłaŭski Ianafan (Anatol Jaleckich);
- vikaryj Tulčynskaj jeparchii, jepiskap Ładyžynski Sierhij (Siarhiej Anicej);
- vikaryj Kijeŭskaj jeparchii archijepiskap Pancielajmon (Viktar Baščuk);
- upraŭlajučy Čarnavicka-Bukavinskaj jeparchijaj mitrapalit Mialecij (Valancin Jahoranka);
- upraŭlajučy Chusckaj jeparchijaj mitrapalit Mark (Mikałaj Piatrovič);
- upraŭlajučy Dnieprapiatroŭskaj jeparchijaj mitrapalit Iryniej (Ivan Siaredni).
Čytajcie taksama:
Dva vybitnyja biełaruskija pravasłaŭnyja śviatary pierajšli va Usialenski patryjarchat
