Uradženiec Homiela ŭznačaliŭ śpis najbahaciejšych biznesmienaŭ Rasii pa viersii Forbes. Jaho bahaćcie aceńvajecca ŭ $25,2 młrd
Zasnavalnik «Jeŭrachima» i «Sibirskaj vuhalnaj enierhietyčnaj kampanii» Andrej Mielničenka ŭpieršyniu staŭ lidaram rejtynhu najbahaciejšych biznesmienaŭ siarod rasijan pa viersii časopisa Forbes. Za hod jaho bahaćcie padvoiłasia.
Andrej Mielničenka. Fota: Wikimedia Commons
U suśvietnym śpisie miljarderaŭ pa viersii Forbes Andrej Mielničenka zajmaje zaraz 58-je miesca.
Andrej Mielničenka naradziŭsia 8 sakavika 1972 hoda ŭ Homieli. Vučycca jon zjechaŭ u Maskvu, zastaŭsia žyć u Rasii. Syn savieckaha fizika, Mielničenka kinuŭ navučańnie, kali ŭ 1991 hodzie raspaŭsia SSSR, kab zasnavać sietku punktaŭ abmienu valuty. Praz dva hady jon zasnavaŭ svoj bank. Kampanii Mielničenki, u jakich pracuje bolš za 100 tysiač čałaviek, za apošnija 15 hadoŭ inviestavali kala 23 miljardaŭ dalaraŭ u vytvorčaść uhnajeńniaŭ i vuhalu.
Mielničenka trapiŭ pad sankcyi ES i Vialikabrytanii ŭ sakaviku 2022 hoda i ZŠA ŭ žniŭni 2022 hoda. Jon nazvaŭ sankcyi «absurdnymi i biessensoŭnymi» i asprečvaje ich.
9 sakavika praz sankcyi jon pakinuŭ skład akcyjanieraŭ «Sibirskaj vuhalnaj enierhietyčnaj kampanii».
U sakaviku minułaha hoda biznesmien nazvaŭ vajnu va Ukrainie trahiedyjaj i zaklikaŭ spynić jaje.
«Budučy ruskim pa nacyjanalnaści, biełarusam pa naradžeńni i ŭkraincam pa kryvi, ja adčuvaju vialiki bol i zamiašańnie, kali baču, jak zmahajucca i hinuć brackija narody», — skazaŭ miljarder. Jaho maci — ukrainka.
Bahaćcie amal usich rasijskich miljarderaŭ, pavodle Forbes, za hod vyrasła.
