Na kanfierencyju ŭ akupavanym Łuhansku pajeduć try vykładčycy biełaruskich VNU. Što za jany?
Vydańnie MOST daviedałasia, što 12 krasavika 2023 hoda Łuhanski ŭniviersitet, jaki znachodzicca na akupavanaj jašče z 2014 hoda terytoryi Ukrainy, zapłanavaŭ pravieści mierapryjemstva pad nazvaj «Mižnarodnaja kanfierencyja «Vajennaja žurnalistyka ŭ sučasnym śviecie». U śpisie ŭdzielnikaŭ kanfierencyi i navat členaŭ prahramnaha kamiteta prysutničajuć i try pradstaŭnicy Biełarusi.
Łuhanski ŭniviersitet. Fota: muravey.su
Pra toje, što za paniaćciem «vajennaja žurnalistyka» ŭ hetym vypadku chavajecca nie žurnalistyka jak takaja, a prapahanda vajny i ŭzbrojenaj ahresii Rasii, śviedčyć šmathadovaja dziejnaść rasijskich «vajenkaraŭ», jakaja razhladajecca i vykarystoŭvajecca rasijskim bokam jak srodak hibrydnaj vajny.
U prahramny kamitet hetaj kanfierencyi ŭvajšli try vykładčycy vyšejšych navučalnych ustanoŭ ź Biełarusi, a mienavita:
- Maryja Kaniuškievič, prafiesar kafiedry žurnalistyki fakulteta historyi, kamunikacyi i turyzmu Hrodzienskaha dziaržaŭnaha ŭniviersiteta imia Janki Kupały;
- Iryna Zajcava, zahadčyca kafiedry moŭ śvietu fakulteta humanitarystyki i moŭnych kamunikacyj Viciebskaha dziaržaŭnaha ŭniviersiteta imia P. M. Mašerava;
- Alena Muratava, prafiesar kafiedry movaznaŭstva fakulteta humanitarystyki i moŭnych kamunikacyj Viciebskaha dziaržaŭnaha ŭniviersiteta imia P. M. Mašerava.
Prafiesar Hrodzienskaha ŭniviersiteta Maryja Kaniuškievič, jakaja ŭvajšła ŭ śpis prahramnaha kamiteta, viadomaja tym, što
jašče ŭ mai 2004 hoda zrabiła linhvistyčnuju ekśpiertyzu apazicyjnaj ulotki na zapyt śledčaha UKDB Biełarusi pa Hrodzienskaj vobłaści. Metaj ekśpiertyzy było vyśvietlić, ci źmiaščaje ŭlotka abrazu prezidenta.
Kaniuškievič pryjšła da vysnovy, što abraza prezidenta maje miesca, i heta stała dokazam pa kryminalnaj spravie ŭ dačynieńni da viadomaha hrodzienskaha pradprymalnika Valeryja Levanieŭskaha, jaki byŭ asudžany na dva hady pazbaŭleńnia voli.
Taksama Maryja Kaniuškievič źjaŭlajecca čalcom Rady pa miedyjalinhvistycy Vyšejšaj škoły žurnalistyki i masavych kamunikacyj Pieciarburhskaha dziaržaŭnaha ŭniviersiteta ŭ Rasii.
Toje, što ŭ śpis prahramnaha kamiteta kanfierencyi ŭ Łuhansku ŭvajšła Iryna Zajcava, nie dziŭna, bo jana z 1978 da 1999, a taksama z 2003 da 2008 hoda vykładała ŭ tym samym Łuhanskim univiersitecie.
U žniŭni 2008 hoda, jašče da pačatku ŭzbrojenaj ahresii Rasii suprać Ukrainy, Iryna Zajcava, jakaja była na toj momant deputatam Łuhanskaj abłasnoj rady, udzielničała ŭ sumiesnaj z krymskimi prarasijskimi dziejačami sustrečy na temu pra nibyta pahrozy ruskamoŭnaj adukacyi ŭ navučalnych ustanovach Kryma i Łuhanskaj vobłaści. Krynicaj pahrozy ŭdzielniki sustrečy nazvali zahady ministra adukacyi Ukrainy ab pastupovym pieravodzie adukacyjnaha pracesu na ŭkrainskuju movu. Jak vykazałasia tady Zajcava, «takija zahady kalečać dziaciej i źjaŭlajucca złačynnymi».
Paźniej hetaja žančyna pracaŭładkavałasia ŭ Nacyjanalny piedahahičny ŭniviersitet Ukrainy ŭ Kijevie, ale ŭ 2016 hodzie adtul zvolniłasia (farmalna pavodle damoŭlenaści bakoŭ) paśla jaje pajezdki ŭ akupavany Krym na mierapryjemstva pad nazvaj «Mižnarodnaja kanfierencyja «Ruskaja mova ŭ polikulturnym śviecie». Zaniesienaja Iryna Zajcava i na sajt «Miratvorac».
U vyniku Iryna Zajcava vyrašyła ŭvohule pakinuć Ukrainu i z 2016 hoda pracuje dy vykładaje ŭ Viciebskim dziaržaŭnym univiersitecie.
Što tyčycca Aleny Muratavaj, jakaja pracuje na kafiedry movaznaŭstva fakulteta humanitarystyki i moŭnych kamunikacyj u Viciebskim univiersitecie, to, chutčej za ŭsio, jana ŭvajšła ŭ śpis praz znajomstva abo pa zaprašeńni Iryny Zajcavaj, jakaja vykładaje na tym ža fakultecie.
Čytajcie taksama:
Śpiavak, jaki pradstaŭlaŭ Biełaruś na «Jeŭrabačańni», raspavioŭ, što rabiŭ u Łuhansku
Vadzim Hihin pajechaŭ naziralnikam na «refierendum» u «ŁNR»
Pakul Ukrainu bambiać, mahiloŭskija dziaržaŭnyja teatry zabaŭlajuć Łuhansk
