«Treba, kab jaho pakašmaryli». U Biełharadskaj vobłaści vałancior, jaki dapamahaŭ žurnalistu kanała «Dožd́», zdaŭ jaho palicyi
U Biełharadskaj vobłaści apieratara telekanała «Dožd́» Ardena Arkmana zatrymali palicejskija. U žurnalista nie było śpiecyjalnaha propusku dla ŭjezdu ŭ prymiežnuju zonu vobłaści. Pra adsutnaść propusku pravaachoŭnym orhanam paviedamiŭ vałancior, jaki sam i pryvioz žurnalista ŭ prymiežnaje siało, piša «Mieduza».
Skryn videa
Zhodna z telekanałam, vałancior Jaŭhien Bakała, jaki zajmajecca dapamohaj biežancam z Ukrainy, pryvioz žurnalista ŭ centr pryhraničnaha siała. Tam mužčyna vyjšaŭ z mašyny, kab parazmaŭlać sa svaimi znajomymi. Im jon paviedamiŭ, što viazie karespandenta «varožaha ŚMI» i damoviŭsia, kab palicyjanty spynili ich aŭtamabil.
«U mianie tut žurnalist z varožaha ŚMI. Pieŭni repartaž robiać. Ja budu jaho zdavać. Treba, kab jaho tam pakašmaryli», — pierakazvaje žurnalist słovy Bakały. Hetuju razmovu Arkman pačuŭ, bo na vałanciory byŭ uklučany mikrafon.
Nieŭzabavie pryjechała palicyja. Žurnalista razam z vałancioram dastavili na pamiežny punkt. Bakału adpuścili, a ad Arkmana zapatrabavali vydalić uvieś źniaty materyjał, matyvujučy heta tym, što «zasiečnaja linija», jakuju siarod inšaha zdymaŭ žurnalist, zjaŭlajecca vajennym abjektam i jaje zdymka zabaronienaja. Paśla pamiežniki zabrali ŭsiu techniku.
Nastupnyja try hadziny Arkmana trymali ŭ nievialikim pakoi, dzie nasuprać jaho siadzieŭ achoŭnik z nakiravanym na žurnalista aŭtamatam. «Pad kaniec jon aŭtamat apuściŭ, tamu što stamiŭsia jaho trymać», — uspaminaje Arkman.
Telekanał «Dožd́» byŭ zabłakavany ŭ Rasii praź niekalki dzion paśla pačatku vajny va Ukrainie i, jak i mnohija inšyja niezaležnyja ŚMI, byŭ vymušany spynić pracu. Uletku kanał adnaviŭ pracu za miežami RF.
