Jak razburany zavadski korpus u centry Minska pierarabili ŭ ofis dla IT-kampanii
Dva z pałovaj hady tamu pramzonu na vulicy Mašerava entuzijasty zadumali pieratvaryć u modnuju prastoru: z kaviarniami, restaranami, sučasnymi ofisami. Bałazie razharnucca było dzie: jašče savieckija «haryzontaŭskija» karpusy chavajuć u sabie tysiačy «kvadrataŭ» z patencyjałam. I choć navin z hetaj placoŭki ŭ dalejšym asabliva nie było, praca viałasia, piša Onliner.
Kvartał u miežach vulic Kujbyšava, Kisialova i Čyčeryna mianiaŭsia tak, jak heta prydumali ŭ Zrobym architects. Treba razumieć, što rekanstrukcyja časta dajecca bolš składana, čym budaŭnictva z čystaha lista. Tamu chutkaha vyniku čakać nie davodzicca: na adno abśledavańnie kanstrukcyj kolki času spatrebicca. Ale pieršyja vyniki ŭžo bačnyja.
Tak, naprykład, adzin z zavadskich budynkaŭ vyhladaŭ letam 2020-ha.
A tak hety ž budynak vyhladaje siońnia.
U minułym hodzie na abnoŭlenyja płoščy zasialiłasia ajcišnaja kampanija RocketData, acaniŭšy nie tolki łakacyju, ale i zavadskuju «spadčynu»: vialikija vokny, vysokija stoli, ciopłyja čyhunnyja batarei.
— Pa-pieršaje, ciapier my znachodzimsia ŭ centry horada — supracoŭnikam zručna dabiracca na lubym hramadskim transparcie, a taksama na aŭto. Pa-druhoje, pobač jość praduktovyja mahaziny i kafe, što vyrašaje pytańni z charčavańniem. Pa-treciaje, my znachodzimsia ŭ Asmołaŭcy — adnym z samych atmaśfiernych rajonaŭ Minska, — raspaviała HR Business Partner RocketData Dzina Šabałdajeva.
