Ministr zamiežnych spraŭ Słavakii adpraviŭ premjera Vienhryi kursam ruskaha vajskovaha karabla. U samym litaralnym sensie
Ministr zamiežnych spraŭ Słavakii Raścisłaŭ Kačar hruba vyłajaŭsia na adras vienhierskaha premjer-ministra Viktara Orbana za jaho palityku, jakaja, na jahonuju dumku, karysnaja prezidentu Rasii Uładzimiru Pucinu, paviedamlaje «Jeŭrapiejskaja praŭda».
Raścisłaŭ Kačar. Fota: AP Photo/Andreea Alexandru
U vialikim paście na fejsbuku słavacki ministr śćviardžaje, što vajennaja dapamoha Ukrainie — maralna pravilny krok, bo heta rasijanie ŭvarvalisia va Ukrainu i zabivajuć tam ukraincaŭ. Pry hetym Jeŭrasajuz adziny ŭ imknieńni dapamahać Kijevu, a ŭbaku zastajecca tolki Vienhryja.
Raścisłaŭ Kačar adznačyŭ, što niadaŭna publična vykazanaja pazicyja Viktara Orbana, što «heta nie naša vajna» — maralna nieprymalnaja.
«Na vychadnych ich karpacki prarok havaryŭ pra toje, što heta nie naša vajna. Heta «prosta vajenny kanflikt pamiž dźviuma słavianskimi dziaržavami». Treba było pakinuć ich u spakoi, izalavać. Heta značyć, chaj rasijanie chucieńka pierabjuć ukraincaŭ. Chaj jany nie chvalujucca.
Jak ahidna. Jak škada. Jak nie pa-chryścijansku. Śviaty Marcin Turski (naradziŭsia ŭ ciapierašniaj Vienhryi) pamior by ad soramu za takich chryścijan», — napisaŭ kiraŭnik MZS Słavakii.
Kačar adznačyŭ, adnak, što ŭ adnym jon zhodny z «hetymi karpackimi kałabarantami rasijskich ahresaraŭ»:
«Pastaŭki zbroi va Ukrainu zaciahvajuć kanflikt i adkładajuć mir. Najbujniejšym pastaŭščykom zbroi va Ukrainu źjaŭlajecca Rasija… Jak tolki rasijanie spyniać pastaŭlać zbroju va Ukrainu, źbiaruć rečy i pajeduć dadomu, u toj samy momant inšyja pierastanuć padtrymlivać Kijeŭ u vajskovym płanie i nastupić mir. Usio vielmi prosta».
Pavodle słoŭ słavackaha ministra,
Słavakija źjaŭlajecca častkaj raźvitaha śvietu, tamu jon «nie choča, kab «jany rabili jak Orban».
A svoj i tak nadzvyčaj niedypłamatyčny post słavacki dypłamat skončyŭ zusim niezvyčajna:
«Dla kałabaracyjanistaŭ Pucina, i asabliva dla našych u Karpackim basiejnie i vysakahorji, dla ŭsich tych, chto choča miru canoj źniščeńnia Ukrainy, u mianie jość tolki adno pasłańnie».
Paśla čaho dadaŭ ruskamoŭnuju łajanku, jakuju ŭkrainskija abaroncy čarnamorskaha vostrava Źmiainy skiravali na adras ruskaha vajskovaha karabla, z borta jakoha da ich pastupiła prapanova zdacca.
Čytajcie taksama:
Orban nazvaŭ Ukrainu «ničyjnaj ziamloj» i paraŭnaŭ jaje z Afhanistanam
Vienhryja sprabuje znoŭ zabłakavać tranš dapamohi Jeŭrasajuza Ukrainie
Orban: Kali ZŠA pierastanuć davać Ukrainie hrošy i zbroju, vajna spynicca
