«Heta histaryčnaje prava Rasii — być mocnaj». Pucin vystupiŭ z pasłańniem
Siońnia Uładzimir Pucin źviarnuŭsia z pasłańniem da Fiederalnaha schodu. Jon paŭtaryŭ svaje letašnija zajavy ab pravie Rasii dałučać inšyja dziaržavy i terytoryi, jakija Maskva ličyć «histaryčna rasijskimi». Prahučała šmat papulizmu i chłuśni, a niaŭdačy na froncie zastalisia zamoŭčanymi. Pucin taksama zajaviŭ, što Rasija prypyniaje ŭdzieł u Damovie ab skaračeńni i abmiežavańni stratehičnych nastupalnych uzbrajeńniaŭ pamiž Rasijaj i ZŠA.
Uładzimir Pucin vystupiŭ sa zvarotam da Fiederalnaha schodu Rasii 21 lutaha 2023 hoda. Skrynšot ź videa
U svaim pasłańni Pucin abvinavaciŭ Zachad i Ukrainu ŭ pačatku vajny, jakuju nasamreč pačała Rasija.
«Da lutaha 2022 hoda ŭsio było hatova da čarhovaj kryvavaj karnaj apieracyi na Danbasie», — skazaŭ jon.
«Heta jany raźviazali vajnu. A my vykarystoŭvajem siłu, kab jaje spynić», — chłuśliva zajaviŭ Pucin.
Kažučy pra Ukrainu, jon paskardziŭsia, što Zachad z XIX stahodździa sprabuje «adarvać hetyja histaryčnyja terytoryi ad ich krainy».
Pucin pakrytykavaŭ rasijskich biznesmienaŭ, što ŭkładali hrošy ŭ zachodnija technałohii i zachodnija rynki.
«U rasijskich biznesoŭcaŭ jość vybar — žyć z aryštavanymi rachunkami na Zachadzie ci być sa svajoj krainaj, raźvivać jaje ekanomiku. <…> Ciapier nie varta sprabavać niešta adsudzić. Vy mocnyja ludzi, jakija prajšli mocnuju škołu — układvajcie ŭ Rasiju, dapamahajcie škołam i ŭniviersitetam. Tak zasłužycie zyčlivaść ludziej», — prapanavaŭ jon «zahładzić hrachi».
«U spravie abarony Rasii my ŭsie pavinny abjadnać, uzhadnić svaje vysiłki i abaviazki i pravy dla padtrymańnia adnaho histaryčnaha najvyšejšaha prava — prava Rasii być mocnaj», — Pucin pad avacyju zały pracytavaŭ Piatra Stałypina.
Ahułam zała apładziravała Pucinu 53 razy, u tym liku čatyry razy — stojačy.
Na praciahu pramovy Pucin supakojvaŭ, što ekanomika nasupierak usiamu vystajała i raźvivajecca — VUP upaŭ usiaho na 2,1 pracenta ŭ minułym hodzie, heta było paŭtorana trojčy i padavałasia jak vialikaje dasiahnieńnie — i nie zhadvaŭ pra niaŭdačy rasijskaj armii na froncie.
Pad samy kaniec zvarotu jon zajaviŭ, što Rasija prypyniaje ŭdzieł u Damovie ab skaračeńni i abmiežavańni stratehičnych nastupalnych uzbrajeńniaŭ pamiž Rasijaj i ZŠA. Hety dakumient abmiažoŭvaŭ kolkaść jadziernych bojezaradaŭ z kožnaha boku da 1550, a lik mižkantynientalnych balistyčnych rakiet, balistyčnych rakiet na padvodnych łodkach i ciažkich bambavikach — da 700. Damova była padpisanaja ŭ 2010 hodzie i była vialikim zdabytkam doŭhaha pieryjadu napružańnia ŭ mižnarodnych adnosinach. Pieršyja pieramovy ab abmiežavańni jadziernych uzbrajeńniaŭ pačalisia jašče ŭ 1970-ch pamiž Niksanam i Brežnievym, sapraŭdnaja razradka pačałasia ŭ kancy 1980-ch. A ciapier śviet skaciŭsia da novaha supraćstajańnia.
