Što budzie, kali pić kavu paśla abiedu
My ŭsie viedajem, što kavu treba ŭžyvać umierana, ale časam tak ciažka admovicca ad kubačka duchmianaha napoju. Jakija nastupstvy vas čakajuć, kali bałavać siabie kavaj u druhoj pałovie dnia?
Kava maje karysnyja ŭłaścivaści: jana tanizuje i źmiaščaje šmat antyaksidantaŭ, jakija abaraniajuć kletki ad uździejańnia svabodnych radykałaŭ i, adpaviedna, ad zapaleńnia i raku. Dva-try kubki kavy na dzień panižajuć ryzyku raźvićcia dyjabietu 2 typu i palapšajuć krovazvarot, pavyšajuć cisk u asob z panižanym ciskam.
Z druhoha boku, kava vymyvaje z arhanizma kalcyj i mahnij, a pavyšeńnie kryvianoha cisku niebiaśpiečnaje dla tych, u kaho hipiertenzija.
Toje, jak kava na nas upłyvaje, zaležyć ad taho, kali my jaje pjom. Kali rabić heta adrazu paśla abudžeńnia, kali ŭ kryvi jašče vysoki ŭzrovień harmonu stresu kartyzołu, stymulujučy efiekt kavy budzie nie nadta vyražany. Reč u tym, što kartyzoł panižaje ŭździejańnie kafieinu, a kava, u svaju čarhu, pavialičvaje vypracoŭku kartyzołu i ŭzmacniaje jaho niehatyŭny ŭpłyŭ na arhanizm. Tamu lepš za ŭsio pić kavu nie adrazu kali pračniešsia, a poźniaj ranicaj.
U daśledavańni 2014 hoda ludziam za piać hadzin da snu davali dozu kafieinu, ekvivalentnuju dźvium porcyjam espresa. U vyniku paddoślednyja daŭžej zasynali, čaściej pračynalisia nočču i mieli bolš karotkija pieryjady hłybokaha snu, nieabchodnaha dla adpačynku i rehienieracyi mozha. Niekalki hadoŭ tamu navukoŭcy vyśvietlili, što viačerniaja kava jašče i parušaje pracu cyrkadnych rytmaŭ čałavieka — bijałahičnaha «hadzińnika» ŭnutry čałavieka, jaki padtrymlivaje jaho funkcyjanavańnie ŭ 24-hadzinnym rytmie. Naprykład, dvajnoje espresa za try hadziny da snu pieravodzić hety «hadzińnik» nazad u siarednim na 40 chvilin.
Žančynam padčas mienapaŭzy varta viedać, što ŭžyvańnie praduktaŭ z kafieinam u druhoj pałovie dnia moža ŭzmacnić u ich potavydzialeńnie nočču. Taksama kafiein maje mačahonnaje dziejańnie, to-bok kali vy pjacie jaho paśla abiedu ci ŭviečary, to vy možacie čaściej naviedvać tualet nočču, a značyć, i pierabivać son. Jość danyja, što ludzi, jakija spažyvajuć šmat kafieinu, čaściej pakutujuć ad nietrymańnia mačy, čym tyja, chto pje kavu i mocny čaj umierana ci ŭvohule jaje nie spažyvaje.
Čytajcie taksama:
Nie kožnaja kava — karysnaja
Kafiein robić čałavieka bolš schilnym da trat. Voś jak heta pracuje
Jak pazbavicca plamaŭ na zubach
