Łukašenka ŭpeŭnieny, što paśla masavaha adjezdu ajcišnikaŭ halina ruchajecca napierad
Na siońniašniaj sustrečy ź biełaruskimi navukoŭcami Alaksandr Łukašenka zajaviŭ, što masavy vyjezd rabotnikaŭ IT-cfiery za miežy krainy nie paŭpłyvaŭ na jaje ŭ niehatyŭnym sensie.
«Voś źjechali — nu nie abrynuŭsia ža IT-siektar u ekanomicy, pramysłovaści, sielskaj haspadarcy. Naadvarot — ruchajecca. Tyja, chto źjechaŭ… Ich miesca zajmajuć inšyja», — aptymistyčna vykazaŭsia Łukašenka.
Pry hetym jon dziažurna adznačyŭ, što za miažoj ajcišnikam kudy horš i bolšaść ź ich rviecca nazad pad jaho kryło:
«Nu kudy im dziecca? Chtości vyjechaŭ, chtości viarnuŭsia. Chtości pajeździŭ pa śviecie — nie, tolki ŭ Biełaruś. U biełarusaŭ heta asablivaść: mała chto moža być za miažoj i być zadavolenym».
Miž tym pa vynikach 2022 hoda ŭniosak IT-siektara ŭ VUP skłaŭ minus 0,2%. A adtok ajcišnikaŭ za hod skłaŭ 15 tysiač rabotnikaŭ.