Maks Korž i Łedzi Haha. U Biełarusi značna pašyryli «čorny śpis» muzykaŭ
U śpisie vykanaŭcaŭ, muzyka jakich zabaronienaja na publičnych imprezach, 87 punktaŭ. Chapaje niečakanych imionaŭ.
Fota: pixabay.com
Jak patłumačyŭ «Našaj Nivie» adzin z pradstaŭnikoŭ ivent-śfiery, taki śpis isnavaŭ jašče z 2020 hoda, ale ciapier jon značna pašyryŭsia. U atrymanym ad Minkulta pieraliku, zrazumieła, jość biełaruskija vykanaŭcy, jakija vystupali suprać hvałtu i režymu Łukašenki: naprykład, heta N.R.M, Navi Band, Hanna Šarkunova, «Lapis Trubiacki», hurt Litesound (čalcy apošniaha ciapier palitviaźni).
Jość u śpisie i Maks Korž.
Zabaranili taksama ŭkrainskich i rasijskich vykanaŭcaŭ, jakija vykazvalisia suprać vajny: u čorny śpis trapili, akramia inšych, DDT, Cina Karal, braty Kanstancin i Valeryj Mieładze, hurt «Mašyna času».
Praŭda, niekatoryja imiony składana patłumačyć. Naprykład, Dźmitryja Kałduna, jaki dahetul vystupaje ŭ Rasii. Ci amierykanskich zorak Šer i Łedzi Hahu.
Śpis zabaronienych artystaŭ, vykładzieny Biełaruskaj radaj kultury. Taki ž atrymaŭ i surazmoŭca «NN» ź ivent-śfiery
Z pačatku hetaha hoda ŭ Biełarusi zabaroniena praviadzieńnie kulturna-vidoviščnych mierapryjemstvaŭ arhanizatarami, nie ŭklučanymi ŭ adpaviedny rejestr. Jak raskazvaje surazmoŭca, paśla Novaha hoda, kali arhanizatary mierapryjemstvaŭ pavinny byli skončyć pracu pa ŭklučeńni ŭ rejestr, da ich pačali zvanić ź Ministerstva kultury. «Nam stali na słovach kazać, što jość vykanaŭcy, jakich nielha prajhravać», — kaža surazmoŭca.
Što budzie, kali parušać sankcyi? Aficyjnaj zabarony na artystaŭ sa śpisa niama, ale, jak dzielicca surazmoŭca, pakarańni ŭsio roŭna strohija: «Kali hraje zabaronienaja pieśnia, ustanova ŭ hety ž dzień vyklučajecca z rejestra i nie moža padavacca na viartańnie tudy, zdajecca, na praciahu hoda. Artyst taksama atrymoŭvaje zabaronu na vystupy na niekalki hadoŭ. Plus jość vielmi vialikija štrafy — jak mnie kazali, ad 50 da 200 bazavych. To-bok, kali ty sabraŭ siabroŭ na dzień naradžeńnia, naniaŭ dydžeja i kavier-bend i niechta ciabie zdaŭ, to buduć takija štrafy i ŭstanovie, i artystu. Prykłady ŭžo jość».
Kali va ŭstanovie budzie hučać zabaronienaja pieśnia, arhanizataraŭ imprezy mohuć aštrafavać «za adstupleńnie ad hastrolnaha paśviedčańnia». Kali ž zahadzia ŭpisać u hastrolnaje paśviedčańnie zabaronienuju pieśniu, to takuju imprezu nie dazvolać.
Dla niekatorych ustanoŭ, ličyć surazmoŭca, čorny śpis muzykaŭ moža stać sapraŭdnaj prablemaj, bo ŭ pieraliku chapaje papularnych artystaŭ: naprykład, toj ža Maks Korž ź jaho chitami.
Pa mierkavańni Biełaruskaj rady kultury, śpis moh składacca z udziełam KDB.
«KDB zaŭždy mieŭ dačynieńnie da kantrolu nad efirnaj palitykaj i hastrolnaj dziejnaściu, ale adkazvała za heta Administracyja. Kažuć, ciapier KDB kiruje ŭsioj ideałohijaj u krainie i bolš aktyŭna ŭklučyŭsia ŭ kantrol, kab nie dapuścić valnadumstva», — prakamientavaŭ kiraŭnik Rady Siarhiej Budkin.
«Naša Niva» — bastyjon biełaruščyny
PADTRYMAĆHurt «Daj darohu!» vypuściŭ novy trek — dla ŭsich śmiełych biełarusaŭ
«Kvietka raście ŭ rebrach»: Syndrom Samazvanca vydaŭ ekzistencyjalny albom «Vostraŭ skarhaŭ»
Pussy Riot vypuścili novuju antyvajennuju pieśniu «Mama, nie hladzi televizar»
Zaraz jon ni režymu ni narmalnym ludziam nie patrebny
Ja nie maču za łajnom i nie maju racyi =(
Patłumačcie