Cichanoŭskaja: Nie dajcie siabie padmanuć, režym nie vykonvaje abiacańniaŭ i nie daje harantyj
Śviatłana Cichanoŭskaja adhuknułasia na siońniašnija naviny pra čarhovyja prapanovy Łukašenki emihrantam viartacca i stvareńnie kamisii na čale z prakuroram Šviedam i vydała adnosna hetaha adpaviednuju zajavu. Jana nie maje iluzij adnosna pryrody režymu i zaklikaje suajčyńnikaŭ nie padmanvacca taksama.
Cichanoŭskaja źviazvaje pakazny kłopat Łukašenki pra toje, kab dać ludziam viarnucca na radzimu z tym, što «Biełaruś vymušana pakinuli sotni tysiač ludziej. Heta śpiecyjalisty samych roznych śfier, bieź jakich ekanomika nie moža narmalna funkcyjanavać. Siońnia deficyt rabočych ruk u krainie — heta prykładna sto tysiač čałaviek».
Ale biełarusy, na jaje dumku, nie mohuć viartacca biez harantyj biaśpieki. A imi moža być tolki toje «čaho ciapier pa vinie režymu ŭ Biełarusi niama: dziejsny zakon, niezaležny sud, pravavyja miechanizmy i demakratyčnyja instytuty».
Cichanoŭskaja źviartaje ŭvahu na toje, što dynamika represiŭnaha pracesu ŭ Biełarusi nie daje padstaŭ dla aptymizmu:
«Kali letam 2022 hoda zatrymlivali pa 100-120 čałaviek na miesiac, to za vierasień 2022 hoda było bolš za 400 zatrymańniaŭ. Za kastryčnik 2022 hoda biełarusam pa palityčnych matyvach prysudzili sumarna 426 hadoŭ niesvabody».
Tamu «nijakija kamisii režymu nie vyrašać kryzisu: palityčnaha, ekanamičnaha i humanitarnaha. Zamiest svabody režym prapanuje biełarusam zaklučyć pahadnieńnie sa śledstvam, kab było miakčej, jak jany kažuć, «stajać na kaleniach».
Zychodziačy z hetaha, Śviatłana Cichanoŭskaja zaklikaje:
«Nie viercie tym, chto tolki za 2022 hod zatrymaŭ 52 biełarusaŭ, jakija viarnulisia dadomu. Pakłapaciciesia pra svaju biaśpieku i biaśpieku svaich blizkich. Nie dajcie siabie padmanuć».
