«Nieabvieržnym dokazam vinavataści źjaŭlajecca fotazdymak»: u Minsku asudzili nastaŭnicu anhlijskaj movy
Sud Savieckaha rajona Minska vynies prysud 24-hadovaj vykładčycy anhlijskaj movy Darji Cyrkun, abvinavaciŭšy jaje va ŭdziele ŭ niadzielnych akcyjach pratestu ŭ 2020 hodzie (č. 1 art. 342 Kryminalnaha kodeksa), paviedamlaje «Viasna».
Fota: «Viasna»
Spravu razhladała sudździa Volha Jemialjančanka. Jana tolki 15 červienia 2022 hoda pryniała prysiahu na zvańnie sudździ.
Pa materyjałach abvinavačańnia, Darja Cyrkun u vieraśni 2020 hoda ŭ Minsku, «dziejničajučy sumiesna i ŭzhodniena hrupaj asob ź inšymi nieŭstanoŭlenymi asobami, pryniała aktyŭny ŭdzieł u hrupavych dziejańniach, jakija hruba parušajuć hramadski paradak i spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady, što paciahnuła parušeńnie pracy transpartu i pradpryjemstvaŭ, akazvajučy pry hetym vidavočnaje niepadparadkavańnie zakonnym patrabavańniam pradstaŭnikoŭ ułady — supracoŭnikam milicyi».
U chodzie sudovaha razboru abvinavačanaja svaju vinu pryznała ŭ poŭnym abjomie.
«Nieabvieržnym dokazam vinavataści abvinavačvanaj źjaŭlajecca fotazdymak, na jakim abjektyŭna zafiksavanyja dziejańni abvinavačanaj u hrupie ź niavyznačanymi asobami. Na fotazdymkach uhledžvajecca ŭzhodnienaść dziejańniaŭ abvinavačvanaj ź inšymi asobami, ich skiravanaść na dasiahnieńnie adzinaha vyniku — ździajśnieńnie dziejańniaŭ, jakija hruba parušajuć hramadski paradak», — da takoj vysnovy pryjšła sudździa.
Sud, jaki adbyŭsia 29 listapada, pastanaviŭ pryznačyć Darji Cyrkun pakarańnie ŭ vyhladzie abmiežavańnia voli biez nakiravańnia ŭ papraŭčuju ŭstanovu adkrytaha typu na termin try hady («chatniaja chimija»).
