Łukašenka padpisaŭ rašeńnie na achovu dziaržaŭnaj hranicy
Alaksandr Łukašenka zaćvierdziŭ rašeńni na achovu dziaržaŭnaj hranicy orhanami pahraničnaj słužby ŭ 2023 hodzie. Charakterna, što sioleta ich dva: na achovu pamiežnikami na ziamli i SPA — u niebie, źviartaje ŭvahu BiełTA.
Pamiežniki zasiarodziać hałoŭnyja namahańni na ŭkrainskim kirunku i ŭčastkach, «dzie mahčymaje ŭźniknieńnie novych źniešnich vyklikaŭ i pahroz pamiežnaj biaśpiecy», adznačyli ŭ Dziaržpahrankamitecie. Pavodle jaho danych, z boku ES i Ukrainy la rubiažoŭ respubliki znachodziacca 23,5 tysiačy zamiežnych vajskoŭcaŭ.
Jak raspavioŭ žurnalistam staršynia DPK Anatol Łapo, «achovu miežaŭ pryjšłosia pierabudavać na paŭdniovym napramku pa ŭsich paramietrach».
Pavodle jaho słoŭ, napružanaść na miažy zachoŭvajecca ŭ tym liku z-za situacyi ź biežancami, jakija praciahvajuć vykarystoŭvać Biełaruś jak tranzitnuju krainu.
U 2022 hodzie pamiežnaja słužba ŭdaskanalvała svaju infrastrukturu. Na bałtyjskim napramku abstalavana bolš za 19 km novych miež achovy, kala 9 km zaharod, pabudavana 8 piešachodnych mastoŭ. Bolš za ŭsio sił i srodkaŭ układziena va ŭzmacnieńnie paŭdniovych rubiažoŭ — na praciahu amal 23 km, taksama pabudavana 26 km zaharod, jakija jašče treba budzie daabstalavać sihnalizacyjaj. Vykarystoŭvajucca sučasnyja srodki kantrolu, uklučajučy siejsmadatčyki, fotakamiery i srodki pieradačy danych.
