ŚMI: Da Pucina i jaho blizkich prystavili piersanalnuju rakietnuju ŭstanoŭku
«Ahienctva. Naviny» vyśvietliła, chto źjaŭlajecca najbolš vierahodnym abjektam dla abarony ŭstanoŭkami ZRPK «Pancyr-S1», jakija ŭ apošnija dni byli zaŭvažanyja na budynkach u centry Maskvy i na nievialikim addaleńni ad padmaskoŭnaj Rubloŭskaj šašy, dzie žyvie rasijskaja elita. Hetyja kompleksy SPA abaraniajuć ad vierahodnaha ŭkrainskaha ŭdaru asabista prezidenta Uładzimira Pucina i jaho blizkich.
Takuju vysnovu možna zrabić paśla źjaŭleńnia ŭstanoŭki SPA, pobač z Vałdajskaj rezidencyjaj rasijskaha prezidenta. Inšych abjektaŭ dla achovy, akramia rezidencyi, tam prosta niama.
Žychar horada Vałdaj u Naŭharodskaj vobłaści vysłaŭ u redakcyju zdymak, zrobleny ŭ vioscy Jaščarava na minułym tydni, — na fatahrafii raźlik kompleksu SPA, jaki, sa słoŭ aŭtara zdymka, byŭ raźmieščany ŭ pasieliščy «niekalki tydniaŭ tamu». Na fota, vierahodna, kompleks «Pancyr-S1». Takija ž u apošnija dni byli zaŭvažanyja ŭ centry Maskvy i ŭ Padmaskoŭi.
Fraza «niekalki tydniaŭ tamu» moža śviedčyć pra toje, što sistema SPA źjaviłasia ŭ Jaščarava nieŭzabavie paśla ataki ŭkrainskich dronaŭ na rasijskija vajskovyja aeradromy ŭ hłybini krainy — pieršaja ataka na avijabazy pad Razańniu i ŭ Enhielsie Sarataŭskaj vobłaści była 5 śniežnia.
«Ahienctva» pahavaryła z aŭtaram zdymka i pierakanałasia ŭ sapraŭdnaści infarmacyi. Žychary Jaščarava i susiednich viosak, ź jakimi źviazałasia «Ahienctva», paćvierdzili raźmiaščeńnie kompleksu SPA na Vałdai. Pa słovach adnaho z surazmoŭcaŭ, kompleks nie staić biez spravy — jon znachodzicca na bajavym dziažurstvie, jak minimum troje vajskoŭcaŭ pastajanna znachodziacca pobač, antena RŁS krucicca.
Jaščarava — adna z dvuch najbližejšych viosak da prezidenckaj rezidencyi, jakaja staić na bierazie adnaho ź miascovych azior pad nazvaj Užyn. Ad Jaščarava da ziamiel prezidenckaj rezidencyi krychu bolš za šeść kiłamietraŭ naprastki.
Vałdajskaja rezidencyja Pucina, choć i nazyvajecca aficyjnaj, amal nie vykonvaje pradstaŭničych funkcyj. Jana bolš viadomaja jak miesca praviadzieńnia volnaha času Pucina, jaho blizkich i siabroŭ. Tudy, pavodle šmatlikich śviedčańniaŭ, na zakrytyja viečarynki pryjazdžali zorki estrady. Tam ža Pucin za začynienymi dźviaryma niaredka sustrakajecca ź vip-haściami. Jak kazali raniej dvoje znajomych Pucina, toj byvaje na Vałdai vielmi časta, «jon lubić» hetaje miesca.
Mienavita ŭ Jaščarava pasialilisia na pastajannaj asnovie nabližanyja da Pucina ludzi nakštałt aficeraŭ FSA i kiraŭnikoŭ Kiraŭnictva spravami prezidenta.
Nijakaj krytyčnaj infrastruktury, stratehičnych abjektaŭ, bujnych pradpryjemstvaŭ abo vialikich zboraŭ vajennaj techniki i asabovaha składu ŭ hetym rajonie niama. Bolš za toje, jašče z savieckich časoŭ u hetym rajonie i tak raźmiaščalisia stacyjanarnyja srodki SPA — 42-y zienitny rakietny połk, raskvataravany ŭ pasiołku «Vałdaj-4». Niejki čas u 90-ch baza pałka znachodziłasia ŭ zaniapadzie, ale z kanca dziasiatych hadoŭ jaho ŭkamplektavali novym uzbrajeńniem, a terytoryju čaści akulturyli. VHTRK navat rabiła repartaž ab słužbie zienitčykaŭ.
Na minułym tydni ŭ sacsietkach źjavilisia fota i videa ŭstanoŭki ZRPK «Pancyr-S1» na administracyjnym budynku ŭ Ciacierynskim zavułku pobač ź mietro Tahanskaja za niekalki kiłamietraŭ ad Kramla. Jašče adnu ŭstanoŭku zaŭvažyli na dachu budynka Minabarony na Frunzienskaj nabiarežnaj. Jana bačnaja ŭžo na fatahrafii 25 śniežnia, pisała «Miedyjazona». Telehram-kanał «Sirena» vykłaŭ dva videa z «Pancyrami» z Padmaskoŭja: na adnym zaŭvažnyja kompleksy ŭ dvuch kiłamietrach ad aeradroma biznes-avijacyi «Astafjeva», raźmieščanaha na poŭdzień ad Maskvy, a na druhim možna ŭbačyć «Pancyr-S1» pobač z pasiołkam Zarečča Adzincoŭskaj haradskoj akruhi Padmaskoŭja, u 10 kiłamietrach ad rezidencyi Uładzimira Pucina ŭ Nova-Aharovie.
Sistema SPA «Pancyr S-1» pryznačanaja ŭ tym liku dla abarony ad bieśpiłotnikaŭ.
