Arastovič daŭ intervju, słovy ź jakoha prapahandysty vyrvali z kantekstu i aktyŭna pościać
U intervju Juryju Ramanienku były daradca Ofisa prezidenta Alaksiej Arastovič skazaŭ, što nichto nie moža harantavać, što Ukraina pieramoža ŭ vajnie. Jaho słovy prapahanda vyrvała z kantekstu.
Arastovič kaža, što va Ukrainie pačałasia hryźnia, ukraincy padviarhajucca infarmacyjnaj vajnie, technałohijam manipulacyi. Ukraincy znachodziacca «ŭ historyi, jakuju krucim užo nie my».
U prykład jon pryvodzić hibiel Dzianisa Manastyrskaha i kiraŭnictva MUS, a taksama svajo zvalnieńnie.
«Voś vybili Arastoviča, jaki byŭ aficyjnym hołasam, adnym z aficyjnych hałasoŭ, šmat čaho ciapier adbyvajecca. Ja, jak čałaviek, jaki troški da hetych rečaŭ mieŭ dačynieńnie ŭ žyćci, mahu skazać, što my ŭžo ŭ historyi, jakuju krucim nie my».
Jon kaža, što «łupiać pa asobach, jakich ličać klučavymi».
Arastovič zaklikaŭ da zachavańnia adzinstva ŭkraincaŭ.
«Pierš čym radavacca, što my niepieramožnyja, nahadvaju, što my niepieramožnyja tolki datul, pakul my nie pačali hryźcisia adno z adnym. Kali my pačali hryźcisia adno z adnym, my vielmi «pieramožnyja». I «pieramožnyja» ŭ samyja karotkija terminy i niečakana dla samich siabie. I kali ŭsie dumajuć, što my harantavana vyjhrajem vajnu, to heta ŭžo małaimavierna».
Arastovič uspomniŭ vykazvańni Andžeja Dudy, prezidenta Polščy, pra vyrašalny miesiac dla Ukrainy. Duda zaklikaŭ sajuźnikaŭ davać bolš uzbrajeńniaŭ Ukrainie, tamu što situacyja składanaja, a najbližejšyja miesiacy pakažuć, ci vyžyvie Ukraina.
«Vy dumajecie, hetaja fraza była prosta tak skazana ci jon na asnovie niejkaj infarmacyi kazaŭ?» — zadaŭ pytańnie Arastovič.
