Na Suśvietnym ekanamičnym forumie ŭ Davosie pryznačyli adkaznaha za Biełaruś
Na Suśvietnym ekanamičnym forumie naznačyli adkaznaha za Biełaruś. Pra heta paviedamiŭ Franak Viačorka, daradca Śviatłany Cichanoŭskaj. Pavodle jaho, z 800 čałaviek, jakija pracujuć u arhanizacyi Suśvietnaha ekanamičnaha forumu, nie było adkaznaha za Biełaruś. Ciapier ža takaja asoba vyznačana, i demsiły pačnuć ź joj pracavać.
Viačorka nazvaŭ udzieł Śviatłany Cichanoŭskaj u forumie spravaj «sapraŭdy nieardynarnaj».
«Uličvajučy toje, što na Forum zaprašajuć daloka nie ŭsich navat kiraŭnikoŭ dziaržaŭ. Joj dali dva vystupy ŭ asnoŭnaj prahramie, u tym liku adzin na hałoŭnaj scenie, na jakoj vystupali za ŭvieś tydzień ahułam tolki 35 śpikieraŭ. Važny sihnał nam, što Forum razumieje važnaść biełaruskaha pytańnia. Raniejšyja forumy mieli vialikaje pradstaŭnictva Rasii, i miesca dla nas tam nie znachodziłasia», — napisaŭ jon.
Pavodle jaho, arhanizatary raspaviali, što adnojčy na Forum pryjazdžaŭ były ministr MZS Uładzimir Makiej, ale nie ŭdzielničaŭ u prahramie forumu, tolki ŭ sajd-iventach, jakija adbyvajucca paralelna.
Važnym nastupnym krokam u supracy z WEF, ličyć Viačorka, było b stvareńnie biełaruskaha Global Shapers Hub. Heta adzin z klučavych prajektaŭ WEF. «Taki chab peŭny čas isnavaŭ u Minsku, ale kiraŭnictva Forumu hatova zrabić vyklučeńnie i dazvolić zapuścić biełaruski chab u Vilni ci Varšavie. Taksama WEF hatovy pryniać biełarusaŭ u prahramu Young Global Leaders, tamu nie saromiejciesia, padavajcie zajaŭki», — napisaŭ jon.
Čytajcie taksama:
Cichanoŭskaja ŭ Davosie kančatkova vyznačyłasia z hieapalityčnym vybaram. Tłumačać ekśpierty
