U Ramštajnie nie ŭchvalili rašeńnie pra tanki dla Ukrainy, ale padtrymka budzie
Niadaŭna pryznačany ministr abarony Hiermanii Borys Pistoryus pa vynikach 8-ha pasiadžeńnia kantaktnaj hrupy pa abaronie Ukrainy na amierykanskaj avijacyjnaj bazie Ramštajn u Hiermanii paviedamiŭ, što rašeńnie ab pieradačy Ukrainie sučasnych zachodnich tankaŭ pakul što nie pryniata.
Padčas sustrečy ŭ Ramštajnie. Fota: Michael Probst / AP Photo
Pa słovach Borysa Pistoryusa, u antyrasijskaj kaalicyi niama adzinadušnaha mierkavańnia — jość arhumienty jak za pastaŭki, tak i suprać ich.
Adnačasova ministr zapeŭniŭ, što Hiermanija pryncypova pieradaču tankaŭ nie błakuje, i ŭ budučyni, mahčyma, Ukraina ŭsio ž taki atrymaje tanki Leopard 2 ad jaho krainy. Akramia taho, «Hiermanija nie budzie stajać na šlachu partnioraŭ».
Pistoryus daŭ zrazumieć, što Hiermanija praviaraje mahčymaści svajoj pramysłovaści, robić reviziju na składach bundeśviera, kab nieadkładna adpravić tanki va Ukrainu adrazu paśla pryniaćcia adpaviednaj palityčnaj pastanovy. «Hety dzień moža nadyści»,— padkreśliŭ ministr.
Pry hetym Polšča, Čechija i Słavakija zajavili, što hatovy addać Ukrainie svaje tanki Leopard. Tak, Słavakija i Čechija hatovy addać Ukrainie tyja tanki, što atrymali ad Hiermanii. Havorka idzie pra amal 30 adzinak ciažkaj techniki.
Raniej hetyja krainy ŭžo pieradali ŭkrainskaj armii tanki savieckaj vytvorčaści, i ŭ ramkach tak zvanaha «kalcavoha abmienu» Hiermanija zamianiła ich mienšaj kolkaściu «Leapardaŭ».
Pavodle damoŭlenaści, Bierlin pavinien byŭ pastaŭlać dva tanki na miesiac. Pieršyja adzinki ciažkaj techniki Słavakija i Čechija, vierahodna, užo atrymali.
Varšava taksama zabraniravała Ukrainie cełuju rotu niamieckich tankaŭ, ale biez palityčnaha rašeńnia Bierlina pieradać ich składana. Premjer Polščy Matevuš Maraviecki choča pastavić Ukrainie nie mienš za 100 bajavych tankaŭ. Taksama pieradać niamieckuju braniatechniku choča i Finlandyja.
Akramia taho, źjaviłasia infarmacyja, što Niderłandy hatovy apłacić tanki Leopard dla Ukrainy.
U cełym ukrainski bok zastaŭsia zadavoleny vynikami samitu. Ministr abarony Ukrainy Alaksiej Reźnikaŭ pa vynikach jaho zajaviŭ:
«Vośmaja sustreča kantaktnaj hrupy pa pytańniach abarony Ukrainy ŭ Ramštajnie skončyłasia. Heta była vydatnaja sustreča siabroŭ. Volny śviet staić z Ukrainaj i apładziruje mužnym ukrainskim vajaram i našamu mužnamu narodu. Ukrainskaja armija atrymaje bolš zbroi i bojeprypasaŭ. My pieramožam. Zło budzie pieramožanaje».
Poŭny aptymizmu i Uładzimir Zialenski:
«U cełym možna padsumavać, što siońniašni «Ramštajn» umacuje našu stojkaść. Partniory pryncypovyja ŭ svaim staŭleńni — jany buduć padtrymlivać Ukrainu, kolki heta nieabchodna dla našaj pieramohi. Tak, pryjdziecca pazmahacca z pastaŭkami sučasnych tankaŭ, ale štodnia my robim macniejšaj vidavočnaść biezalternatyŭnaści taho, što rašeńnie pa tankach pavinna być pryniata. Ja dziakuju ŭsim partnioram, jakija vyrazna padtrymali ŭkrainskuju pazicyju ŭ dyskusijach, što adbylisia».
