Pa spravie «rejkavych partyzan» z Mazyra sud abviaściŭ pierapynak da 8 lutaha
Homielski abłasny sud bolš miesiaca razhladaje ŭ zakrytym režymie kryminalnuju spravu ŭ dačynieńni da «rejkavych partyzan» z Mazyra — 34-hadovaha Siarhieja Pleškuna i 45-hadovaha Juryja Sielviča. Sud pačaŭsia jašče 6 śniežnia, paviedamlaje «Viasna».
Sudovy praces viadzie sudździa Aleh Charoška.
Palitviaźni Siarhiej Plaškun i Juryj Sielvič paznajomilisia adzin z adnym u 2020 hodzie padčas paślavybarčych pratestaŭ. Pra ich zatrymańnie stała viadoma 10 sakavika 2022 hoda. Jak ličyć śledstva, padčas akcyj pratestu ŭ 2020 hodzie jany vychodzili na darohu z bčb-ściaham i błakavali transpart na centralnych vulicach Minska.
Kančatkovaje abvinavačańnie mazyranam vystaŭlenaje pa siami artykułach Kryminalnaha kodeksa:
- č. 2 art. 295-3 — niezakonnyja dziejańni ŭ dačynieńni da pradmietaŭ, dziejańnie jakich zasnavanaje na vykarystańni haručych rečyvaŭ;
- č. 2 art. 289 — akt teraryzmu;
- č. 1 art. 342 — arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich;
- č. 4 art. 309 — naŭmysnaje pryviadzieńnie ŭ nieprydatnaść transpartnaha srodku abo šlachoŭ znosin;
- art. 341 — apahańvańnie zbudavańniaŭ i psavańnie majomaści;
- č. 1 art. 130 — raspalvańnie inšaj sacyjalnaj varožaści abo varažniečy;
- č. 1 art. 361 — sadziejničańnie ekstremisckaj dziejnaści.
Zhodna z materyjałami spravy, u pieryjad sa žniŭnia 2020 hoda pa luty 2022 hoda Plaškun i Sielvič nabyli kampanienty dla vyrabu «kaktejlaŭ Mołatava» i piratechničny vyrab, jakija zachoŭvali ŭ roznych miescach i pieravozili ŭ roznych transpartnych srodkach z metaj ich nastupnaha vykarystańnia pry ździajśnieńni akta teraryzmu, napadzie na budynki, ustanovy, transpartnyja srodki, a taksama na supracoŭnikaŭ pravaachoŭnych orhanaŭ.
Akramia hetaha, Plaškun nibyta sam vyrabiŭ «kaktejli Mołatava» i sumiesna ź Sielvičam padrychtavaŭsia da naŭmysnaha pryviadzieńnia ŭ nieprydatnaść transpartnych srodkaŭ i šlachoŭ znosin, što mahło paciahnuć śmierć čałavieka, krušeńnie abo avaryju.
U praciah svaich dziejańniaŭ Plaškun, jak śćviardžaje śledstva, vykarystoŭvajučy Telegram-kanał, pryznany ekstremisckim farmiravańniem, raźmiaściŭ videafajł z kamientarami pra datu i čas pieramiaščeńnia vajskovaj techniki, vajenizavanych padraździaleńniaŭ i vajskoŭcaŭ z metaj ažyćciaŭleńnia ekstremisckaj dziejnaści. Paśla čaho padjechaŭ da adnaho z pradpryjemstvaŭ Mazyrskaha rajona i darožnaha znaka, dzie nanios farbaj na płot i na znak cyničnyja malunki i nadpisy, u jakich daŭ niehatyŭnuju acenku žycharam zamiežnaj dziaržavy, paviedamlała Hienieralnaja prakuratura.
Na čarhovym sudovym pasiadžeńni 17 studzienia sudździa abviaściŭ pierapynak da 8 lutaha. Pryčyna takoha rašeńnia nieviadomaja, tak jak sud prachodzić u zakrytym režymie.
