Supracoŭnika «Biełtelekama» asudzili na šeść z pałovaj hadoŭ kałonii za zdabyćcio piersanalnych danych siłavikoŭ
U Viciebskim abłasnym sudzie 5 śniežnia ŭ zakrytym režymie asudzili palitźniavolenaha Dźmitryja Kachanoŭskaha pavodle č. 3 art. 352 (niepravamocnaje zavałodańnie kampjutarnaj infarmacyjaj), č. 3 art. 130 (raspalvańnie inšaj sacyjalnaj varožaści), č. 3 art. 203-1 (niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych) Kryminalnaha kodeksa. Sudździa Jaŭhienij Burunoŭ asudziŭ Dźmitryja na šeść hadoŭ i šeść miesiacaŭ pazbaŭleńnia voli ŭ kałonii va ŭmovach ahulnaha režymu, piša «Viasna».
Dźmitryj Kachanoŭski — inžynier-sistematechnik Mahiloŭskaha adździaleńnia «Biełtelekama» — byŭ zatrymany na pracoŭnym miescy 28 kastryčnika 2021 hoda. Maje dzicia.
Zhodna z abvinavačvańniem, mužčyna nibyta «zdabyvaŭ z bazy asabistyja danyja siłavikoŭ, dziaržsłužačych, sudździaŭ». Śledstva śćviardžaje, što ŭsiaho było 46 takich epizodaŭ. Dźmitryj byŭ źmieščany ŭ SIZA-1, na pačatku listapada 2022-ha pieraviedzieny ŭ viciebski SIZA-2.
Sa studzienia 2023-ha KDB uklučyŭ palitviaźnia ŭ śpis «asob, jakija majuć dačynieńnie da terarystyčnaj dziejnaści».
Padtrymajcie palitviaźnia: PK № 1. 211440, h. Navapołack, vuł. Techničnaja, 8 (Dźmitryj Leanidavič Kachanoŭski)