Za dapamohu bataljonu Kalinoŭskaha — piać hod kałonii, za «cyničnyja» nadpisy suprać vajny — paŭtara
Homielski abłasny sud 9 studzienia vynies prysud dvum žycharam Homiela — Uładzisłavu Jacenku i Kiryłu Płakuščavu. Ich abvinavacili pavodle art. 341 (apahańvańnie zbudavańniaŭ i psavańnie majomaści) i č. 2 art. 361-3 (udzieł na terytoryi zamiežnaj dziaržavy va ŭzbrojenym farmavańni abo ŭzbrojenym kanflikcie, vajennych dziejańniach, viarboŭka albo padrychtoŭka asob da takoha ŭdziełu), piša «Viasna».
Adnamu z chłopcaŭ 21 hod, druhomu — 24. Sudovy praces pačaŭsia 29 listapada i doŭžyŭsia paŭtara miesiaca ź pierapynkami. Spravu razhladaŭ sudździa Mikałaj Dola.
Pavodle materyjałaŭ śledstva, adzin z chłopcaŭ nieadnarazova raźmiaščaŭ u adnoj z sacsietak publikacyi z zaklikam da ŭdziełu ŭ vajennych dziejańniach u składzie bataljona Kastusia Kalinoŭskaha, «Azova» i inšych farmavańniaŭ Uzbrojenych sił Ukrainy. A jašče pieravioŭ 21 jeŭra dla bataljona Kastusia Kalinoŭskaha.
Taksama chłopcaŭ abvinavacili ŭ tym, što jany nanosili cyničnyja nadpisy i malunki na ścieny budynkaŭ u abłasnym centry. Sud acaniŭ škodu ŭ 130 rubloŭ.
Pravaabaroncam pakul nieviadoma, chto mienavita z chłopcaŭ «zaklikaŭ dałučycca da bataljona Kalinoŭskaha», a chto «nanosiŭ nadpisy». Za pieršaje «złačynstva» adnaho z hamielčukoŭ pakarali piaćciu hadami pazbaŭleńnia voli ŭ kałonii ŭzmocnienaha režymu, a jaho siabar atrymaŭ za «nadpisy» paŭtara hoda pazbaŭleńnia voli ŭ kałonii ahulnaha režymu.
