Asudžanaha žurnalista i ŭładalnika kaljannaj Ivana Muraŭjova pieraviali ź minskaha SIZA ŭ mahiloŭskaje
Jak stała viadoma Biełaruskaj asacyjacyi žurnalistaŭ, 11 studzienia ź SIZA №1 Minska ŭ SIZA pry turmie №4 Mahilova da ahałošvańnia vynikaŭ razhladu apielacyi adpravili videapieratara-fryłansiera, pradprymalnika Ivana Muraŭjova.
26 śniežnia 2022 hoda sudździa Minskaha haradskoha suda Alena Šylko pryhavaryła Ivana Muraŭjova da 2,5 hadoŭ pazbaŭleńnia voli ŭ kałonii ahulnaha režymu. Stolki, kolki pierad hetym i zapatrabavała pradstaŭnica prakuratury.
Słužba manitorynhu BAŽ daviedałasia ad blizkich asudžanaha, što Ivana Muraŭjova ŭžo dastavili ŭ śledčy izalatar pry mahiloŭskaj turmie №4. Pierad hetym jašče paśpieła adbycca sustreča sa svajakami: ź ich słoŭ, trymajecca jon dobra, maralny i fizičny stan narakańniaŭ nie vyklikaje.
Surazmoŭcy ŭdakładnili, što ŭ izalatary Ivan prabudzie da razhladu apielacyi Viarchoŭnym sudom — adpaviednyja dakumienty tudy ŭžo nakiravanyja, ale data pasiadžeńnia pakul što nie vyznačanaja. Chaj u biełaruskich umovach farmalna, ale ličycca, što da pracedury abskardžańnia prysud jašče nie nabyŭ moc, tamu adrazu nakiravać čałavieka ŭ kałoniju nielha.
Pry hetym, jak śviedčyć dośvied papiarednich palityčnych «siadzielcaŭ», źmiena hieałakcyi da razhladu skarhi śviedčyć jak minimum pra dźvie akaličnaści. Pa-pieršaje, staličnaja «Vaładarka» pa-raniejšamu pierapoŭnienaja i jość nieabchodnaść raskidać asudžanych pa inšych izalatarach. Pa-druhoje, abrany rehijon namiakaje na budučaje miesca adbyćcia pakarańnia — ź vialikaj dolaj upeŭnienaści možna prahnazavać, što datyčna Ivana Muraŭjova heta budzie albo papraŭčaja kałonija №15 u Mahilovie, albo papraŭčaja kałonija №2 u Babrujsku.
Čytajcie taksama:
Niestandartny harderob, ban na tannuju harełku, Akreścina. Historyja Ivana Muraŭjova — ruchavika minskaj kaljannaj kultury
Stała viadoma, za što asudzili Ivana Muraŭjova
