Rasijanie raźviali biełaruskaha ajcišnika, skraŭšy ŭ jaho bujny telehram-kanał «AjCiBarada»
Alaksiej Kartyńnik — znakamity biełaruski błohier ad IT. U jaho papularny jutub-kanał, jość taksama i telehram-kanał na 25 tysiač padpisantaŭ. Ale ad siońnia tam pačała źjaŭlacca rekłama machlarskaj schiemy pa vymańvańni hrošaj. Akazvajecca, prahramista raźviali rasijanie i skrali kanał.
Siońnia ŭ vieryfikavanym telehram-kanale «AjCiBarada» ceły dzień publikujecca rekłama machlarskaj schiemy, meta jakoj — vymanić z naiŭnych čytačoŭ spačatku hrošy ŭ pamiery 10 tysiač rasijskich rubloŭ, a potym — i danyja kartak.
Aŭtar kanała, biełarus Alaksiej Kartyńnik, u svaim tvitary napisaŭ, što jaho ŭzłamali i dostupu da 25-tysiačnaha kanała ŭ jaho niama.
Ale jak raźviali huru IT?
«Samym prostym sposabam razvodu, jaki isnuje dziasiatki hod, ale ja pavioŭsia,
— raskazvaje Kartyńnik. — Dasłali list na mejł, adkryŭsia telehramaŭski markietpłejs (jon daŭno isnuje, ale da jaho niama dostupu ŭ zvyčajnych karystalnikaŭ), možna zajści rekłamu zakupić. Vielmi pryhoža list napisany, plus damien, ź jakoha adpraŭleny list, taksama sa słovam «telehram», a ja čamuści paličyŭ, što časam telehram dasyłaje z roznych damienaŭ listy, słovam, pajšoŭ dalej.
Nie padumaŭ uvohule, što heta moža być skam. Pierajšoŭ pa spasyłcy, tam uvioŭ danyja svajho akaŭnta, mnie ŭ telehramie (u dadatku) prylacieŭ kod na ŭvachod — zvyčajnaja pracedura. Ja hety kod uvioŭ na toj sajt.
A potym mianie paprasili ŭvieści moj kod dvajnoj aŭtaryzacyi. Tut užo čyrvonyja ściažki, bo zvyčajna tak nie robiać, zvyčajna hety kod nidzie aproč dadatku ŭvodzić nie treba. Nu ja i ŭvioŭ, i ŭsio — heta ŭsio ŭviali zamiest mianie ź inšaha dadatku i ŭvajšli ŭ moj akaŭnt.
Mnie pryjšła abviestka, što niechta z Maskvy zajšoŭ u moj akaŭnt, ale ja padumaŭ, što heta, napeŭna, bot, jaki adkryvaje dostup u rekłamny kabiniet i łahinicca praź niejkija rasijskija sierviery. I siońnia mnie voś napisali, što na maim kanale pościać niejkuju łuchtu».
Viadoma, ź jahonaha akaŭnta machlary pieradali prava administravać kanał sabie, a jahony akaŭnt vydalili.
«Ja pierarehistravaŭ simku, ale dostupu ŭ hetaha akaŭnta da kanałaŭ niama. Sprabuju viarnuć dostup da kanała, nie viedaju, ci atrymajecca. Z adnaho boku, śmiešna, što prahramist pavioŭsia na taki stary i papularny razvod. Ź inšaha, škada, kali niechta z fałovieraŭ paviadziecca na toje, što tam rekłamujecca.
Ale maje padpisanty — razumnyja ludzi z ajciški, i zrazumiejuć, što heta łabuda», — reziumuje jon.
