Vitala Jenaroviča, jakoha ŭtrymlivali na «sutkach» amal try miesiacy, asudzili da dvuch hadoŭ kałonii
U Minskim haradskim sudzie 12 śniežnia razhledzieli kryminalnuju spravu pavodle č. 1 art. 130 (raspalvańnie inšaj sacyjalnaj varožaści) i č. 1 art. 342 (aktyŭny ŭdzieł u dziejańniach, jakija hruba parušajuć hramadski paradak) KK suprać 37-hadovaha Vitala Jenaroviča. Sudździa Viera Hałaŭkova pryznačyła jamu dva hady kałonii, piša «Viasna».
Mužčynu zatrymali ŭ sakaviku i ŭtrymlivali na «sutkach» u CIP Akreścina amal try miesiacy bieź źmiennaha adzieńnia i srodkaŭ hihijeny. Jaho byłyja sukamierniki raspaviali, što letam na Akreścina jon usio jašče byŭ u zimovaj vopratcy. Važna adznačyć, što čas, praviedzieny na Akreścina, nie budzie zaličany ŭ termin pa kryminalnaj spravie.
Naprykancy červienia Jenaroviča pieraviali ŭ SIZA-1. Były sukamiernik Vitala z «Vaładarki» raspavioŭ, što adrazu jamu staviŭsia ŭ vinu ŭdzieł u adnym z maršaŭ. Ale pierad zakryćciom spravy jamu vystavili abvinavačvańnie pavodle č. 1 art. 130 KK — u internecie znajšli jaho kamientary za žnivień 2020-ha.
