Čamu nastupnaje pachaładańnie samaje važnaje ŭ hetym stahodździ. Hety miesiac moža vyrašyć i našu dolu
U piatnicu, 6 studzienia, tempieratura ŭ Minsku apuścicca da minus 16 hradusaŭ. Ale hałoŭnaje, što ŭ subotu, 7-ha, arktyčny antycykłon apuścicca da linii frontu va Ukrainie. U Mielitopali stanie minus 5, u Vałnavasie minus 11, a ŭ Svatavie minus 12. Heta aznačaje, što nadychodzić momant nieviadomaści i niepradkazalnaści. Hety studzień moža vyrašyć los vajny. Tłumačym čamu.
Raźbityja rasijskija tanki ŭ pasieliščy Kamienka Charkaŭskaj vobłaści. 30 kastryčnika 2022 hoda. Fota: Efrem Lukatsky / AP Photo
Front rasijska-ŭkrainskaj vajny amal nie zaznaŭ źmien z 11 listapada, kali rasijskija vojski adstupili z Chiersona. Raŭnavahu bakoŭ abumoŭlivała nadvorje.
Paśla daždžystaj vosieni ŭkrainskija čarnaziomy raspłylisia. Daroh na poŭdni Ukrainy šmat, ale jany zaminavanyja i prystrelenyja. Kab nastupać, treba praryvać front palami, jarami i dalinami, ciažkaprachodnaj miascovaściu. Dla ŭkrainskaha boku ŭ chalepu heta asabliva ciažka, bo ŭkraincy sastupajuć pa kolkaści tankaŭ rasijanam.
Padčas nastupu pad Iziumam, jaki staŭ pierałomnym momantam vajny, taktykaj ukraincaŭ byli małankavyja praryvy frontu na kołavaj technicy — ad broniemašyn da džypaŭ. Takoha dabra Ukraina atrymała ad sajuźnikaŭ niamała, a voś tanki pakul joj pastaŭlalisia tolki savieckich i juhasłaŭskich madelaŭ, časam madernizavanych, prytym nie tak i šmat.
Adnak kołavaja technika nie moža jeździć pa raskisłym čarnaziomie, jana ŭ im hruźnie.
Marazy zrobiać stepavy hrunt iznoŭ ćviordym. Miarkujučy pa prahnozach sinoptykaŭ, antycykłon zatrymajecca na ŭschodniejeŭrapiejskich raŭninach davoli nadoŭha. Čakajecca jak minimum tydzień ustojlivych marazoŭ, pryčym jany nadyduć tady, kali ŭstojlivaje śniehavoje pokryva jašče nie sfarmirujecca, što vykliča hłybokaje pramiarzańnie hleby.
Takim čynam, da siaredziny studzienia, da pravasłaŭnaha Vadochryšča, sfarmirujucca ŭmovy, kali nastup adnaho z bakoŭ stanie znoŭ mahčymy. Ale chto budzie nastupać?
I heta čarhovaje nieviadomaje. Chto paśpieŭ nazapasić nieabchodnyja dla nastupu resursy, bojeprypasy i techniku, Ukraina ci Rasija?
Paśla šerahu pośpiechaŭ u pieršy miesiac vierałomnaj ahresii rasijskaja armija ciarpieła parazu za parazaj.
U kancy sakavika rasijanie adstupili z-pad Kijeva, Čarnihava i Sumaŭ.
U mai i červieni jany nie zdoleli prarvać ukrainskuju abaronu na Danbasie.
U žniŭni zdaryłasia katastrofa pad Iziumam, jakuju mnohija paraŭnoŭvajuć ź bitvaj pad Mukdenam časoŭ rasijska-japonskaj vajny 1905 hoda.
U kastryčniku pasypałasia rasijskaja abarona pad Chiersonam, i Rasija pakinuła adziny zaniaty joju ŭ 2022 hodzie abłasny centr.
Dalej nastupać Ukrainie budzie našmat ciažej. Linija frontu na poŭdni skaraciłasia z 1300 da 800 kiłamietraŭ, pryčym bolšaja častka jaho ciapier prachodzić pa niepieraadolnych ci ciažkapieraadolnych dla ŭkrainskaj armii Dniapry i haradskoj zabudovie Danbasa. Vyklučeńnie składajuć kala 200 kiłamietraŭ ad Dniapra da Daniecka na poŭdzień ad Zaparožža i kala 100 kiłamietraŭ ad Kramiannoj da Svatava i rasijskaj miažy.
Stan frontu na pačatak studzienia 2023 hoda. Mapa: Wikipedia Commons
Z palityčnych mierkavańniaŭ ukrainskaja armija nie zachodzić na terytoryju Rasijskaj Fiederacyi — nie choča, kab Maskva vykarystała hety fakt dla ŭzbudžeńnia patryjatyčnych nastrojaŭ.
Hałoŭnaja nieviadomaja — nakolki ŭzmacnili rasijskuju armiju mabilizavanyja. Bolšaja častka ich akurat skončyła padrychtoŭku i prybyvaje na front. Kolkaść kałasalnaja: pa aficyjnych źviestkach, mabilizavali 300 tysiač, ale, miarkujučy pa infarmacyi ź miescaŭ, uziali našmat bolš. Ale ci majuć jany dastatkova techniki?
Prychodzili sihnały, što navat udarnyja hrupoŭki vahnieraŭcaŭ užo nie majuć dastatkova bojeprypasaŭ.
Nie było i śviedčańniaŭ, što rasijskaja armija pavysiła svoj bajavy duch. Niahledziačy na ahramadnyja biudžety prapahandy, rasijskim bajcam brakuje matyvacyi. Naadvarot, na froncie jany asabista nazirajuć biazdarnaść kamandavańnia, biazładździe z łahistykaj i razryŭ pamiž «karcinkaj» i realnaściu. Nie treba być ekśpiertam, kab bačyć kantrast u zabieśpiačeńni ŭkrainskaj armii i rasijskich mabilizavanych.
Rasijskija mabilizavanyja. Fota: AP
Tym nie mienš, tolki nastupnyja bai pakažuć siłu bakoŭ na hety momant.
Samym naturalnym kirunkam prasoŭvańnia ŭkrainskaj armii pakul vyhladaje poŭnač Łuhanskaj vobłaści (Kramiannaja, Svatava, Starabielsk, Rubiežnaje) ź jaje pierasiečanym łandšaftam.
Adnak los vajny maje vyrašycca nie tam, a pad Zaparožžam. Kali hienierał Załužny prarvie rasijskuju ešałanavanuju abaronu tam, ukrainskaja armija padstupić da Mielitopala i Biardzianska. Heta razrezała b rasijskuju hrupoŭku na dźvie častki. Jak tolki ŭkrainskija vojski vyjduć na ŭźbiarežža Azoŭskaha mora, Krymski most stanie ŭ dasiažnaści ŭkrainskich kryłatych rakiet, pavietranych i padvodnych bieśpiłotnikaŭ. Rasijskaja hrupoŭka ŭ Krymie adrazu apyniecca ŭ situacyi, anałahičnaj toj, jakaja była na pravabiarežžy Chiersonskaj vobłaści: pratrymacca niekalki miesiacaŭ možna, naładzić marski transpartny most možna, ale ŭtrymacca składana.
Pieraprava cieraz vadaschovišča na race Sievierski Daniec u Charkaŭskaj vobłaści, dzie most byŭ padarvany. Fota: Evgeniy Maloletka / AP Photo
Płany Rasii va Ukrainie pravalilisia, jana nie zdoleła dasiahnuć pastaŭlenych u lutym 2022 hoda zadač. Ale kančatkovy vynik vajny, linija raźmiežavańnia i paślavajenny status Rasii, unutrypalityčnaja situacyja ŭ joj dahetul nie vyznačanyja, prajaśniacca pa vynikach bajoŭ 2023 hoda.
Prycelny ŭdar ukrainskaj artyleryi pakinuŭ na miescy budynka PTV u Makiejeŭcy, dzie načavali niekalki socień rasijskich vajskoŭcaŭ, adny ruiny. Hety epizod navahodniaj nočy paćvierdziŭ efiektyŭnaść ukrainskaj vajennaj taktyki. Fota: AP Photo
Marozny studzień 2023-ha abiacaje stać piakielna haračym miesiacam. Sočym za prahnozami sinoptykaŭ.
