Kramy «Vostraŭ čyścini i smaku» nie pracujuć, u inšych kramach i na zapraŭkach prablemy z apłataj. Što adbyvajecca?
Čytačy «Lusterka» paviedamili, što ŭ handlovych sietkach «OMA», «Vostraŭ čyścini i smaku», a taksama «Maciaryk» prablemy z pracaj kasavaha abstalavańnia. Niekatoryja z kram začynienyja.
Jak raspavioŭ adzin z supracoŭnikaŭ kramy «Vostraŭ čyścini i smaku», z ranicy 2 studzienia kramy začynienyja.
— Z samaj ranicy niama mahčymaści na kasie adkryć źmienu — prablemy z kasavym abstalavańniem, jakoje pastaŭlaje i absłuhoŭvaje «Tuson», — napisaŭ ananimna mužčyna.
— Fiskalny rehistratar nie ŭstanaŭlivaje biahučy čas na kasie, supracoŭniki «Tusona» vyrašyć prablemu nie mohuć. Supracoŭniki kram zastajucca na pracoŭnych miescach i čakajuć, pakul niepaładki vypraviać. Pa słovach surazmoŭcy, takija ž prablemy ŭ budhipiermarkietach «Maciaryk», jaki vykarystoŭvaje toje ž kasavaje abstalavańnie.
Inšyja čytačy paskardzilisia na pieraboi z pracaj u kramach «OMA» — niekatoryja ź ich, dzie niama kas samaabsłuhoŭvańnia, začynienyja.
«U Homieli skazali, što nie pracujuć kasy. Naviedvalnikaŭ nie puskajuć, z zały ludzi vychodziać», — napisaŭ u redakcyju «Lusterka» adzin z žycharoŭ horada.
— Na Baravoj u «OMA» pracuje tolki dźvie kasy samaabsłuhoŭvańnia z čatyroch, a zvyčajnyja kasy zusim nie pracujuć. Supracoŭnik skazaŭ, što tak z samaha adkryćcia. Ja sam byŭ u «Maciaryku» — tam zusim začynilisia. A «Mile» pracuje bieź jakich-niebudź prablem, — napisaŭ jašče adzin minčuk.
Žurnalistka «Lusterka» patelefanavała na haračuju liniju sietki «Vostraŭ čyścini i smaku» jak zvyčajnaja pakupnica — tam paćvierdzili, što kramy pakul začynienyja i nieviadoma, kali zapracujuć znoŭ. Takim ža sposabam my źviazalisia z «OMA» — u sietcy budmateryjałaŭ skazali, što prablema sapraŭdy była, ale častkova vypraŭlenaja — ciapier pakupniki mohuć apłacić tavary pa karcie na kasach samaabsłuhoŭvańnia.
Taksama pišuć pra padobnyja prablemy ŭ «Jeŭraopcie»: «Nie pracuje nivodnaja kasa, pryčym uvohule nijak: ni pa hatoŭcy, ni pa bieznajaŭnym raźliku. Ale pracuje kasa samaabsłuhoŭvańnia!» — napisali pakupniki adnaho z supiermarkietaŭ u Asipovičach.
— Na žal, nie ŭsie kramy dastupnyja dla absłuhoŭvańnia. Adbyŭsia zboj, i na mnohich kasach ciapier nie pravodzicca absłuhoŭvańnie za najaŭnyja hrošy i kartaj. Kali jość kasy samaabsłuhoŭvańnia, vy možacie raspłacicca tam bankaŭskaj kartaj. Prosim prabačeńnia za dastaŭlenyja niazručnaści, — adkazali pa telefonie davieru handlovaj sietki «Jeŭraopt» i prapanavali padkazać detali pa pracy kankretnaha mahazina.
Akramia hetych bujnych sietak, čytačy skardziacca na padobnyja prablemy z kramami «Sportmajstar», na niekatorych zapraŭkach sietki «Hazpramnafta» i «Biełarusnafta».
Dapoŭniena. Pra padobnuju prablemu paviedamlajuć i litoŭskija ŚMI. Nie pracujuć kramy sietki Maxima, dzie niama kas samaabsłuhoŭvańnia. Prablemy taksama nazirajucca ŭ kramach Lidl i H&M. Pryčyna taja ž — prablemy z kasavym abstalavańniem.
