U apošni dzień 2022 hoda kalinoŭcy šturmavali rasijskija pazicyi, dvuch bajcoŭ lohka paraniła. Novy hod dobraachvotniki sustreli himnam «Pahonia» VIDEA
Bajec pałka imia Kalinoŭskaha Alaksandr «Kuś» Kłačko raskazaŭ «Našaj Nivie», jak dobraachvotniki śviatkavali Novy hod, jakaja vydałasia pieršaja noč 2023 hoda, i dasłaŭ videa, źniataje apoŭnačy.
Biełaruskija dobraachvotniki. Skrynšot ź videa navahodniaha zvarotu pałka imia Kalinoŭskaha
Navahodni zvarot pałka Kalinoŭskaha ahučyli kamandzir padraździaleńnia Dzianis «Kit» Procharaŭ, kamandzir bataljona «Litvin» Kirejeŭ Ihnat «Bułak» i kamandzir bataljona «Vołat» Jan «Biełaruś» Mielnikaŭ. Jany adrasavali jaho suajčyńnikam — jak tym, jakija zmahajucca suprać režymu Łukašenki, tak i tym, chto «praciahvaje žyć pad pryhniotam dyktatury» ci padtrymlivaje jaje.
Pieršym pramaŭlaŭ Dzianis Procharaŭ.
«Šanoŭnyja biełarusy i biełaruski, usie tyja, chto razam z nami zmahajecca suprać rasijskaj ahresii va Ukrainie, i ŭsie, chto ŭ vyhnańni z našaj rodnaj Biełarusi, — skazaŭ jon. — Usie, kaho los zanios u roznyja kutki śvietu, i tyja, chto praciahvaje žyć pad pryhniotam dyktatury.
Usie, chto ŭ poŭnaj miery adčuvaje katavańni, a taksama ŭsie, chto da hetaha času nie zaŭvažaje hetaj samaj dyktatury ci robić taki vyhlad. Tyja, chto jaje pakul padtrymlivaje. Usie, chto la stanka i pakul što ŭ pahonach. Usie, chto vučyć, lečyć, zajmajecca biznesam, sportam i mastactvam u hety nialohki čas. Padychodzić da zakančeńnia 2022 hod».
«U hetym hodzie, — praciahnuŭ Ihnat Kirejeŭ, — my stvaryli biełaruski połk imia Kastusia Kalinoŭskaha, jaki staŭ pobač z ukraincami ŭ vajnie suprać rasijskaj ahresii i pastaviŭ sabie metu — vyzvaleńnie Biełarusi praz vyzvaleńnie Ukrainy.
Hety hod byŭ hodam baraćby, raźvićcia i sapraŭdnych vyprabavańniaŭ. My ŭdaskanalvali svaje navyki i vykonvali bajavyja zadańni ŭ najharačejšych miescach frontu».
«Nas stanovicca ŭsio bolš i bolš, — kazaŭ jon. — Na vialiki žal, my taksama tracim našych pabracimaŭ, čyje imiony nazaŭždy zastanucca ŭ našaj pamiaci i ŭ pamiaci ŭsiaho biełaruskaha naroda».
Kamandzir pałka Dzianis Procharaŭ (źvierchu), kamandzir bataljona Ihnat Kirejeŭ i kamandzir bataljona «Vołat» Jan Mielnikaŭ. Skrynšoty z navahodniaha zvarotu pałka imia Kalinoŭskaha
«Napieradzie nas čakaje jašče adzin hod zmahańnia, — praciahvaŭ Jan Mielnikaŭ. — Hod, u jakim treba vystajać dziela tych, chto zahinuŭ. Chto ciapier u turmie i pakutuje. Dziela tych, chto rabiŭ historyju ŭčora i robić jaje siońnia.
My — novaja kahorta biełarusaŭ, jakija zmahajucca za svaju nacyju i za hanarovaje imia naščadkaŭ połackich družyńnikaŭ, rycaraŭ Vialikaha Kniastva Litoŭskaha, vajaroŭ Kalinoŭskaha, naščadkaŭ BNR. Sercy ŭsich našych ludziej prahnuć pieramohi nad akupantam i ichnimi prychvaśniami ŭ Biełarusi. My zrobim usio mahčymaje dziela hetaha», — kazaŭ jon.
«Biełaruski połk imia Kalinoŭskaha abiacaje i nadalej stajać u abaronie Ukrainy i prykłaści maksimum vysiłkaŭ, kab meta našaha naroda ździejśniłasia i Biełaruś stała svabodnaj u novym hodzie, a dziaržava była dla naroda zhodna z zapavietam Kastusia Kalinoŭskaha.
«Čas pryjdzie, biełarusy. Z novymi siłami ŭ novy 2023 hod. Žyvie Biełaruś», — padsumavaŭ Jan Mielnikaŭ.
«Maja meta — vyzvalić Biełaruś»
U apošni dzień 2022 hoda kalinoŭcy šturmavali rasijskija pazicyi. Bajec Alaksandr «Kuś» Kłačko raskazaŭ «Našaj Nivie», što ŭ składzie raźliku padtrymlivaŭ sasłužyŭcaŭ ahniom. Pavodle jaho słoŭ, dvoje kalinoŭcaŭ atrymała lohkija ranieńni, a ŭ praciŭnika byŭ, prynamsi, adzin zabity.
Pa vykanańni zadańnia kalinoŭcy viarnulisia na bazu, nakryli stoł. Navahodździe sustreli pieśniaju na słovy Maksima Bahdanoviča «Pahonia».
«Heta nie było zapłanavana, ale niechta ŭklučyŭ na telefonie našu «Pahoniu». Usie ŭstali, prykłali ruku da serca i padpiavali. Heta byŭ vielmi mocny i kranalny momant. Jaho nielha pierakazać słovami», — apaviadaje Alaksandr.
2022 hod kalinoviec nazyvaje zvyčajnym hodam, u jaki adbyvajucca «važnyja histaryčnyja padziei».
Alaksandr kaža, što 2022 hod dazvoliŭ jamu zrazumieć, što najvialikšymi dla jaho kaštoŭnaściami źjaŭlajucca vola i hodnaść.
«Hety hod daŭ mnie vajskovy dośvied, jaki tym samym nabliziŭ mianie da ździajśnieńnia majoj mety. Maja meta — heta vyzvaleńnie Biełarusi».
Alaksandr «Kuś» Kłačko. Fota: archiŭ Alaksandra Kłačko
Alaksandr Kłačko vieryć, što vyzvaleńnie Biełarusi mahčymaje.
Hibiel sasłužyŭcaŭ na vajnie zaŭždy pieražyvajecca nadzvyčaj ciažka, kaža kalinoviec pra straty 2022 hoda.
Dla jaho asabista pakutlivym vyprabavańniem stała hibiel Vadzima «Papika» Šatrova dy Ivana «Bresta» Marčuka. Abodva zahinuli ŭ bai pad Lisičanskam.
Ivan «Brest» Marčuk. Skrynšot z navahodniaha zvarotu pałka imia Kalinoŭskaha
«Hetyja straty nie tolki dla mianie, ale i dla ŭsioj Biełarusi», — davodzić kalinoviec i dadaje, što pieražyvaje za los pałanionaha Siarhieja «Klašča» Dziohcieva.
Alaksandr zyčyć, kab u nastupnym hodzie jon i sasłužyŭcy źbierahli siabie maralna i fizična, bo heta «samaje hałoŭnaje, kab dasiahnuć ahulnych metaŭ — vyzvalić Biełaruś».
Navahodni stoł biełaruskich dobraachvotnikaŭ. Fota: Alaksandr Kłačko
Kalinoviec adznačaje, što pavinšavaŭ z Novym hodam videazvarotam svaich rodnych i siabroŭ. Ź im ža jon vinšuje ŭsich biełarusaŭ.
«Ja liču, što trapna, svoječasova skazanaje słova inšym razam dapamahaje bolš, čym zbroja luboha kalibru», — padsumoŭvaje kalinoviec Alaksandr «Kuś» Kłačko.
«Naša Niva» — bastyjon biełaruščyny
PADTRYMAĆ«Ja pastaviŭ na kon usio». Apošniaje intervju ź Ivanam «Brestam», jaki zahinuŭ kala Lisičanska
Chto takija «Atam», «Siabro» i «Papik». Raskazvajem pra traich bajcoŭ z pałka Kalinoŭskaha, jakija, napeŭna, zahinuli
Pracavała buchhałtarkaj, žonka adnaho z bajcoŭ. Chto takaja Kryścina «Čabor» z pałka Kalinoŭskaha?
