«Pucin daje Jeŭropie šans adumacca». Kramloŭskaja mietadyčka raskazvaje prapahandzie, jak treba padvodzić vyniki hoda
Palityčny błok Administracyi prezidenta RF padrychtavaŭ mietadyčku dla prapahandy pra toje, jak mienavita treba padvodzić vyniki 2022 hoda. Usie rekamiendacyi ŭ dakumiencie, jaki trapiŭ u rasparadžeńnie «Mieduzy», padzielenyja na čatyry błoki: «hałoŭnaje», «uzmacnieńnie Rasii», «SVO» (tak rasijskija ŭłady nazyvajuć vajnu z Ukrainaj) i «novy śvietaparadak».
Fota: Gavriil Grigorov, Sputnik, Kremlin Pool Photo via AP
U raździele «Hałoŭnaje» aŭtary «rekamiendujuć» u čarhovy raz padkreślić, što Uładzimir Pucin, adpraviŭšy vojski va Ukrainu, «pryniaŭ adzina pravilnaje rašeńnie, čym praduchiliŭ napad Ukrainy i NATA na terytoryju Rasii, jaki rychtavaŭsia». U mietadyčcy havorycca, što zachodnija krainy rychtavalisia da ataki na Rasiju z 2014 hoda i źbiralisia «padzialić i skaryć rasijski narod» (mienavita ŭ 2014-m Rasija anieksavała Krym i spravakavała kanflikt na Danbasie).
«Śpiecapieracyju» aŭtary tekstu nazyvajuć «paśpiachovaj», a ŭ jakaści paćviardžeńnia razvažajuć ab «abaronie Rasijaj miljonaŭ ruskich ludziej, viartańni ruskich ziamiel i ŭmacavańni nacyjanalnaj biaśpieki».
Pry hetym aŭtary nie zhadvajuć, što Maskva nie kantraluje całkam ni adzin z čatyroch anieksavanych rehijonaŭ, a taksama straciła Chierson — adziny ŭkrainski abłasny centr, zachopleny rasijskaj armijaj paśla 24 lutaha.
Składalniki mietadyčki adznačajuć, što rasijskaja armija «paśpiachova dasiahaje mety SVO pa demilitaryzacyi i denacyfikacyi Ukrainy». Paćviardžać hetuju dumku jany rajać z dapamohaj aficyjnych źviestak, jakija rehularna publikuje Minabarony RF (z realnaściu jany majuć mała ahulnaha).
Zrešty tut ža prapahandystam «rekamiendujuć» abmovicca, što Rasija vajuje nie z Ukrainaj, a z NATA — «mahutnaj vajskovaj mašynaj u historyi čałaviectva», jakaja tym nie mienš «nie złamała rasijskaje vojska».
NATA — heta vorah zusim inšaha maštabu i ŭzroŭniu, čym kijeŭski režym. Kali b nie Zachad, Ukraina daŭno była b demilitaryzavanaja i pryniała b umovy Rasii. Chutkich pieramoh nichto nie čakaje — čas pracuje na Rasiju. Situacyja znachodzicca pad kantrolem: zacišša na froncie źviazana ź pierahrupoŭkaj sił i nieabchodnaściu navučyć mabilizavanych, pryvodzić «Mieduza» tezisy mietadyčki.
U toj ža čas aŭtary prapanujuć prapahandystam inšy tezis — «Zachad daje ŭsio mienš techniki i srodkaŭ Ukrainie», ale nie tłumačać, jak być z tym, što jon supiarečyć usiamu astatniamu.
Narešcie, u błoku «ŭzmacnieńnie Rasii» składalniki tekstu «rekamiendujuć» rabić akcent na «zhurtavańni hramadstva». Naprykład, vysoki aficyjny rejtynh Pucina (pavodle acenki VCIOM jamu daviarajuć 78,5% respandentaŭ) jany naŭprost źviazvajuć z «biezumoŭnaj padtrymkaj rasijanami śpiecapieracyi». Pry hetym, jak raniej raspaviadała «Mieduza», navat zakrytyja apytańni Kramla paćviardžajuć: rasijanie stamilisia ad vajny i chočuć mirnych pieramoŭ z Ukrainaj.
Dadatkova ŭ svaich vynikovych videa i tekstach prapahandysty raskažuć rasijanam pra toje, što ekanomika krainy maje «vielizarny zapas tryvałaści i patencyjał dla raźvićcia», a «situacyja ŭ joj i dalej budzie palapšacca» (nasamreč heta, naturalna, nie tak).
U raździele «novy śvietaparadak» supracoŭniki administracyi Pucina nazyvajuć Rasiju «lidaram krain», jakija «nie pryznajuć vyklučnaść Zachadu», i «lidaram spraviadlivaha, demakratyčnaha i šmatpalarnaha śvietu».
U kramloŭskaj mietadyčcy skazana, što Pucin daje «Jeŭropie šaniec adumacca i viarnuć sabie subjektnaść i budučyniu». Ciapier ža jeŭrapiejskija krainy ŭjaŭlajuć saboj «vasałaŭ» i «pieryfieryju» ZŠA, i budučynia ŭ ich jość tolki «ŭ ciesnym supracoŭnictvie z Rasijaj».
