Šmat rasijan, litoŭcaŭ i łatyšoŭ, mary pra napłyŭ uźbiekaŭ. Padviedzienyja vyniki biełaruskaha turystyčnaha siezona
U Nacyjanalnym pres-centry padviali vyniki raźvićcia ŭjaznoha i ŭnutranaha turyzmu ŭ Biełarusi ŭ 2022 hodzie, a taksama ahučyli prahnoz na 2023 hod, piša Myfin.by.
Fota: celes.club
Pavodle dziaržaŭnaj statystyki, usiaho sa studzienia pa vierasień 2022 hoda (statystyka za ŭvieś hod budzie tolki ŭ lutym) Biełaruś naviedali kala 1 młn 163 tys. zamiežnych turystaŭ. Pryrost da pakazčykaŭ 2021 hoda skłaŭ kala 22%.
Najbolš było haściej z Rasii — kala 383 tys. (biez uliku turystaŭ, jakija pierasiekli miažu Biełarusi naziemnym transpartam). Ahulnaja płyń turystaŭ z Rasii vyrasła na 8%.
Akramia rasijan, Biełaruś u 2022 hodzie naviedali 315 tys. hramadzian Litvy, što ŭ 7 razoŭ bolš, čym za anałahičny letašni pieryjad. U tyja ž 7 razoŭ pavialičyŭsia patok haściej z Łatvii, z Polščy — zastaŭsia na raniejšym uzroŭni. Hetamu paspryjaŭ biaźvizavy režym dla hramadzian krain-susiedak.
Taksama Biełaruś naviedvali turysty z Kitaja i Turcyi.
U 2022 hodzie, jak śćviardžajecca, vyrasła kolkaść tych turystaŭ, jakija dla raźmiaščeńnia vybirajuć u Biełarusi hateli premium-kłasa. Heta ŭ asnoŭnym turysty z Rasii, jakija da pandemii i sankcyj aktyŭna lotali adpačyvać u Jeŭropu, a ciapier im u radaść i Biełaruś.
U asnoŭnym da nas pryjazdžajuć zamiežnyja pradstaŭniki siaredniaha kłasa, jak praviła, 30-40 hadoŭ. U adroźnieńnie ad moładzi, jany čaściej za ŭsio adpačyvajuć u biełaruskich sanatoryjach.
Sa studzienia pa kastryčnik 2022 hoda, jak śćviardžajecca, zamiežnyja turysty prynieśli ŭ ekanomiku Biełarusi kala 150 młn dalaraŭ, što na 39% bolš za letašni pakazčyk za anałahičny pieryjad.
U 2022-m raźvivaŭsia i ŭnutrany turyzm. Sa studzienia pa vierasień 1 młn 157 tys. biełarusaŭ skarystalisia pasłuhami turystyčnych ahienctvaŭ dla padarožžaŭ pa Biełarusi. Heta na 200 tys. čałaviek, ci na 16%, bolš, čym za anałahičny pieryjad 2021 hoda.
Na 2023 hod prahnozy ŭ čynoŭnikaŭ aptymistyčnyja. Staršynia praŭleńnia Respublikanskaha sajuza turystyčnaj industryi Filip Huły zajaviŭ, što ŭ 2023 hodzie i ŭ bolš dalokaj pierśpiektyvie čakajecca pavieličeńnie patoku turystaŭ z krain Šanchajskaj arhanizacyi supracoŭnictva. Maŭlaŭ, tam
«nabirajuć papularnaść tury vychadnoha dnia. I, naprykład, dla žycharoŭ Uźbiekistana adpačynak u Minsku na roŭnych kankuryruje z pajezdkaj u Stambuł».
Čynoŭniki taksama spadziajucca, što adnym z kirunkaŭ ujaznoha turyzmu ŭ 2023 hodzie stanuć aŭtobusnyja tury z Rasii ŭ Biełaruś jak impartazamiaščeńnie jeŭrapiejskim turam.
