U Viarchoŭnym sudzie raskazali ab pryčynach skasavańnia šlubaŭ
Jak vynikaje z sudovaj praktyki, hałoŭnyja pryčyny skasavańnia šlubu — niepieraadolnyja adroźnieńni ŭ pohladach, adsutnaść ahulnych intaresaŭ, niesumiaščalnaść charaktaraŭ.
Z hetymi pryčynami (pa vyvučanych spravach) źviazanaja pałova ŭsich razvodaŭ u Biełarusi, paviedamiŭ žurnalistam namieśnik staršyni Viarchoŭnaha suda Andrej Zabara, piša BiełTA.
Na dolu takoj pryčyny, jak nienaležnyja pavodziny muža ci žonki (ałkahalizm, narkamanija, hulniamanija, siamiejny hvałt), prypadaje 12%. Paasobnaje pražyvańnie muža i žonki na praciahu doŭhaha času, u tym liku źviazanaje z pracoŭnaj mihracyjaj, stała pryčynaj razvodaŭ u 19% vypadkaŭ, šlubnaja zdrada — u 7%. Stratu pačućcia prychilnaści adno da adnaho, lubovi, pavahi ŭ jakaści pryčyny razvodu nazvali kala 12% sužencaŭ.
Jak adznačyŭ Andrej Zabara, takaja statystyka śviedčyć, što mnohija ludzi, jakija biaruć šlub, u tym liku maładyja ludzi, nie hatovyja da šlubnaha žyćcia i nie ŭjaŭlajuć tych mahčymych składanaściaŭ, ź jakimi im pryjdziecca sutyknucca.
Namieśnik staršyni Viarchoŭnaha suda zaŭvažyŭ, što kolkaść razvodaŭ nie źmianšajecca. U 2021 hodzie orhanami, jakija rehistrujuć akty hramadzianskaha stanu, zarehistravana zvyš 59 tysiač šlubaŭ, a ŭ ahulnaj sukupnaści praz zahsy i sudovyja rašeńni skasavana kala 40 tysiač šlubaŭ.
