«Kibierpartyzany» zdabyli tekst rasijskaj spravazdačy ab biełaruskich pratestach 2020 hoda
Spravazdača ŭjaŭlaje saboj paviarchoŭny analiz dziejańniaŭ biełaruskich aktaraŭ, ale paćviardžaje dapamohu Rasii ŭ padaŭleńni pratestaŭ. Aŭtary z zadavalnieńniem kanstatujuć, što «praźmiernaja žorstkaść» Łukašenki pry padaŭleńni pratestaŭ pazbaviła jaho režym usiakaj «mahčymaści palityčnaha łaviravańnia».
Hrupoŭka «Kibierpartyzany» praciahvaje publikavać dakumienty, zdabytyja pry ŭzłomie Raskamnahlada. Siońnia jana vykłała spravazdaču ab padziejach 2020 hoda, padrychtavanuju rasijskim analitykam.
Spravazdača ŭjaŭlaje saboj paviarchoŭny analiz dziejańniaŭ biełaruskich aktaraŭ, ale paćviardžaje dapamohu Rasii ŭ padaŭleńni pratestaŭ.
Aŭtary spravazdačy z zadavalnieńniem kanstatujuć, što «Łukašenka, jaki źviarnuŭsia pa dapamohu da Rasii ŭ pieryjad najbolš aktyŭnaj fazy palityčnaha kryzisu i atrymaŭ padtrymku partniora pa Sajuznaj dziaržavie, trapiŭ u jašče bolšuju zaležnaść ad jaho, što tolki ŭzmacnili ŭviedzienyja na hetym fonie suprać Biełarusi zachodnija sankcyi».
Jany pry hetym pryznajuć, što «vybudavanaja A. Łukašenkam ekanamičnaja madel vyjaviłasia niežyćciazdolnaj i zaležnaj ad źniešnich aktaraŭ. Stratehija «manieŭravańnia» pamiž najbujniejšymi palityčnymi hulcami śvietu taksama pravaliłasia. Ihnaravańnie ŭnutranych prablem, adarvanaść elit ad nasielnictva ŭ kančatkovym rachunku pryvodziać da kanfliktu, navat va ŭmovach amal poŭnaj začystki palityčnaj prastory, jak i pakazaŭ hety kiejs», — pišuć rasijskija analityki.
Jany ŭ toj ža čas kanstatujuć, što Biełaruś stała dla Rasii karysnym palihonam, na jakim vypraboŭvalisia technałohii kantrolu za hramadstvam.
«U hety ž čas … Rasijskaja Fiederacyja sapraŭdy vyprabavała na praktycy mietodyku procidziejańnia «kalarovym revalucyjam» z vykarystańniem pahrozy ŭmiašańnia, padtrymki lidaraŭ, dezaryjentacyi pratestu, kantrolu za infarmacyjnym paradkam dnia».
Raskamnahlad — heta struktura, jakaja zajmajecca kantrolem i cenzuraj internetu, a taksama padaŭleńniem palityčnych praciŭnikaŭ režymu Uładzimira Pucina.
«Kibierpartyzany» — hrupoŭka chakieraŭ, jakaja ŭtvaryłasia ŭ 2020 hodzie i pastaviła na mecie procistajać dyktatury Alaksandra Łukašenki. Minskaja administracyja pryznała ich «terarystyčnaj arhanizacyjaj».
«Vymušany zvarot pa padtrymku i dapamohu da RF na fonie praźmiernaj žorstkaści pry padaŭleńni pratestaŭ i rozyhryš krainami Zachadu karty «ŭrada ŭ vyhnańni» pakinuŭ Biełaruś biez mahčymaści palityčnaha łaviravańnia i šturchnuŭ jaje da dalejšaj intehracyi z Rasijaj, tolki za košt jakoj biełaruskaja ekanomika ŭsio jašče zastajecca na płavu», — havorycca ŭ dakumiencie, zdabytym kibierpartyzanami.
Čytajcie taksama:
Biełaruskija kibierpartyzany zajavili pra ŭzłom rasijskaha Raskamnahlada
«Zvani siudy, što takoje?» Paśla źlivaŭ telefonnych razmoŭ čynoŭniki i siłaviki masava pieraviali svaju kamunikacyju ŭ miesiendžary
Chabar, pjanstva, vykarystańnie danych u svaich metach. Kibierpartyzany apublikavali infarmacyju z asabistych spraŭ supracoŭnikaŭ HUBAZiK
