Pucin: My nie źbirajemsia razmachvać jadziernaj zbrojaj jak brytvaj, biehajučy pa ŭsim śviecie
Na sustrečy z pravaabaroncami siabra Savieta pa pravach čałavieka Śviatłana Makavieckaja paskardziłasia Uładzimiru Pucinu, što pahroza jadziernaj vajny zdajecca ŭsio bolš realnaj. Jana paprasiła jaho paćvierdzić, što Rasija ni pry jakich abstavinach nie prymienić jadziernuju zbroju pieršaj.
Fota: Minabarony Rasii
«Pahroza jadziernaj vajny… Vy majecie racyju. Takaja pahroza narastaje, čaho hrachu taić», — adkazaŭ Pucin.
«Nakont taho, što Rasija ni pry jakich abstavinach nie prymienić pieršaj. Ale kali nie prymienić pieršaj ni pry jakich abstavinach, značyć, i druhi taksama nie prymienić, tamu što mahčymaści prymianieńnia ŭ vypadku naniasieńnia jadziernaha ŭdaru pa našaj terytoryi mocna abmiežavanyja», — zajaviŭ rasijski prezident.
Pry hetym jon zapeŭniŭ pravaabaroncu, što ŭsia rasijskaja stratehija pabudavana vakoł sustrečnaha ŭdaru ŭ adkaz: «To bok, kali pa nas nanosicca ŭdar, my nanosim u adkaz».
«My svaich sajuźnikaŭ budziem abaraniać usimi najaŭnymi ŭ nas srodkami, — padkreśliŭ Pucin. — My nie zvarjacieli, my ŭśviedamlajem, što takoje jadziernaja zbroja».
«Hetyja srodki ŭ nas jość i jany ŭ bolš prasunutym vyhladzie znachodziacca, čym u jakoj by tam ni było inšaj jadziernaj krainy. Ale my nie źbirajemsia razmachvać hetaj zbrojaj jak brytvaj, biehajučy pa ŭsim śviecie. Ale, viadoma, zychodzim z taho, što jana jość. Heta faktar, jaki nie pravakuje, a strymlivaje».