Dzieviać čałaviek nielehalna pierajšli biełaruska-ŭkrainskuju miažu, kab dałučycca da ŭkrainskaj armii
Kiraŭnik Rovienskaj abłasnoj vajskovaj administracyi Vital Koval zajaviŭ, što z pačatku rasijskaha ŭvarvańnia za niezakonnaje pierasiačeńnie biełaruska-ŭkrainskaj miažy ŭ jaho vobłaści zatrymali 17 inšaziemcaŭ — hramadzian Biełarusi, Rasii, Pakistana i Indyi. 9 ź ich dałučylisia da ŭkrainskaj armii.
Dvuch hramadzian — Rasii i Biełarusi — vydvaryli z Ukrainy, bo jany nie zmahli dakładna patłumačyć pryčynu i metu niezakonnaha pierasiačeńnia.
«Ci byli hetyja ludzi, jakich admysłova adpravili z terytoryi Biełarusi dla vyjaŭleńnia słabych miescaŭ na miažy dla mahčymaha zachodu dyviersijna-raźviedavalnych hrup, — vyśviatlajuć pravaachoŭniki. Rešta ludziej [hramadzian Biełarusi i Rasii], jakija nielehalna pierasiekli miažu, abo ŭžo vajujuć na baku Ukrainy suprać akupanta, abo prachodziać padrychtoŭku da słužby va Uzbrojenych siłach Ukrainy», — udakładniŭ Vital Koval u efiry «Radio Triek».
U toj ža čas Vital Koval nie ŭdakładniŭ ahulnuju kolkaść biełarusaŭ i rasijan, jakija niezakonna pierasiekli miažu i ciapier vajujuć na baku Ukrainy. Imavierna, razmova idzie pra 11 hramadzian Biełarusi i Rasii, bo, pavodle jaho, u łahiery dla ŭciekačoŭ znachodziacca šaściora hramadzian Pakistana i Indyi, jakija taksama byli zatrymanyja pry niezakonnym pierasiačeńni biełaruska-ŭkrainskaj miažy.
6 śniežnia Centr nacyjanalnaha supracivu, jaki źviazvajuć z ukrainskaj raźviedkaj, zajaviŭ, što biełaruskija pamiežniki naŭmysna nakiroŭvajuć uciekačoŭ ź Irana i Pakistana na ŭkrainskija miežy.
Rovienskaja vobłaść — adna ź piaci abłaściej Ukrainy, što miažujuć ź Biełaruśsiu.
