Ukraina ŭdaryła dronami pa aeradromach u hłybini Rasii. U Maskvy bolš niama manapolii na źniščeńnie čužoj infrastruktury
Uzbrojenyja siły Ukrainy (USU) 5 i 6 śniežnia nanosili ŭdary bieśpiłotnikami pa celach u hłybini Rasii. Niepasredny ŭron nie zanadta vialiki. Adnak 6 śniežnia ŭkrainski bieśpiłotnik znoŭ atakavaŭ celi na aeradromie na terytoryi RF — skład paliva ŭ Kursku. Akramia taho, paviedamlajecca, što ŭ toj ža dzień byŭ źbity dron, jaki celiŭsia ŭ aeradrom Bielbiek u Krymie. Usie hetyja ŭdary mohuć stać pierałomnym momantam dla ciapierašniaha etapu vajny: Kijeŭ pačaŭ vykarystoŭvać ułasny varyjant kryłatych rakiet i, vierahodna, chutka pazbavić Maskvu manapolii na źniščeńnie čužoj infrastruktury, piša «Mieduza».
Jakija bieśpiłotniki vykarystoŭvali USU?
Krynica The New York Times va ŭkrainskim vajennym kiraŭnictvie zajaviła, što bieśpiłotniki byli zapuščanyja z terytoryi Ukrainy. Adlehłaść da samaj dalokaj celi — aeradroma ŭ horadzie Enhielsie Sarataŭskaj vobłaści — ad kantralujemaj Kijevam terytoryi (uschod Charkaŭskaj vobłaści) składaje kala 630 kiłamietraŭ.
Minabarony RF paviedamiła, što dla ŭdaraŭ vykarystoŭvalisia «reaktyŭnyja bieśpiłotniki savieckaj vytvorčaści». Heta dobra stasujecca z videazapisam udaru, źniatym kamieraj nazirańnia ŭ Enhielsie: niezadoŭha da vybuchu na aeradromie vyrazna čuvać huk reaktyŭnaha ruchavika.
Adziny «reaktyŭny bieśpiłotnik savieckaj vytvorčaści», jaki moža pieraadoleć bolš za 600 kiłamietraŭ, — Tu-141 «Stryž».
Hety BPŁA dla apieratyŭnaj raźviedki ŭ tyle supiernika raspracavali ŭ kancy 1970-ch. Jon byŭ zdolny pralacieć tysiaču kiłamietraŭ z chutkaściu, blizkaj da chutkaści huku, pa zahadzia ŭviedzienym u pamiać kampjutara maršrucie. Mašyna była pa sučasnych mierkach vializnaj: jaje daŭžynia składała amal 15 mietraŭ, vaha — bolš za piać ton.
Da 1990-ch «Stryž» maralna sastareŭ i staŭ by adnosna lohkaj cellu dla SPA. Z tych časoŭ jon vykarystoŭvaŭsia va US RF i Ukrainy jakraz u jakaści mišeni dla navučańnia raźlikaŭ zienitna-rakietnych kompleksaŭ. Adnak USU paśla 2014 hoda znoŭ pastavili «Stryžy» na ŭzbrajeńnie svajoj raźviedki i vykarystoŭvali ich na Danbasie.
U kastryčniku 2022-ha Ukraina paviedamiła, što raspracavała i rychtuje da vytvorčaści ŭłasny ciažki dron-kamikadze dalokaściu ŭ tysiaču kiłamietraŭ i bajavoj častkaj vahoj 75 kiłahramaŭ. A 4 śniežnia, napiaredadni ŭdaraŭ pa aeradromach u Rasii, zajaviła, što drony prachodziać «apošnija vyprabavańni». Całkam vierahodna, što pad hetym majecca na ŭvazie hłybokaja madernizacyja Tu-141. Dla hetaha ŭ krainy jość vytvorčaja i inžyniernaja baza: «Stryžy» ŭ SSSR vypuskalisia na Charkaŭskim avijacyjnym zavodzie.
Pa adkrytych danych, «Stryž» moža pieraadolvać častku maršrutu na vyšyni 50 mietraŭ. Heta značna ŭskładniaje zadaču SPA: čym mienšaja vyšynia, tym mienšaja dalokaść, na jakoj latalny aparat moža być znojdzieny i abstralany SPA, i nižejšaja vierahodnaść jaho źbićcia.
«Stryž» u bazavym varyjancie nie mieŭ udarnych mahčymaściaŭ. Adnak Ukraina sprabavała hetyja mahčymaści dadać: u samym pačatku poŭnamaštabnaj vajny ŭ charvackaj stalicy Zahrab upaŭ (vierahodna, straciŭšy kiravańnie) Tu-141 USU, vypuščany z rajona Vińnicy. U im charvackija śledčyja znajšli 120-kiłahramovy zarad vybuchoŭki.
Udary aznačajuć, što USU zaraz zmohuć rehularna bambavać celi ŭ hłybini Rasii?
Tearetyčna takija reaktyŭnyja drony-kamikadze — anałah kryłatych rakiet (čym «Stryž», abstalavany bajavoj častkaj, pa sutnaści, i źjaŭlajecca).
Adnak nieviadoma, jakuju mienavita madernizacyju prajšli «Stryžy» va USU ŭ apošnija miesiacy (i naohuł, ci sapraŭdy «ciažkija drony» — mienavita madernizavanyja «Stryžy»).
Kali za asnovu sapraŭdy ŭziaty Tu-141, treba pamiatać, što ŭ 1980-ja Charkaŭski avijazavod vyrabiŭ usiaho kala 150 dronaŭ. Tak što va Ukrainie (asabliva va ŭmovach vajny) mohuć uźniknuć prablemy z maštabavańniem vytvorčaści BPŁA.
Tym časam efiektyŭnaja taktyka vykarystańnia takich bieśpiłotnikaŭ stavić na mecie ŭdary dziasiatkami aparataŭ (dla taho kab «pieranasycić» sistemy SPA, jakija zdolnyja abstrelvać tolki abmiežavanuju kolkaść celaŭ). Mienavita tak robiać US RF, kali nanosiać masiravanyja ŭdary pa celach va Ukrainie.
Akramia taho, nie ŭsie kamplektujučyja BPŁA vyrablalisia va Ukrainie. Adnak najvažniejšyja kampanienty (naprykład, ruchavik vytvorčaści zaparožskaha kancerna «Mator Sič») krainie napeŭna dastupnyja. Usio astatniaje možna kupić: Ukraina, u adroźnieńnie ad Rasii, nie znachodzicca pad sankcyjami suprać abaronnaha siektara.
Ale dośvied pieršaha vykarystańnia novych madelaŭ pakinuŭ pytańni. Pakul nie zrazumieła, ci dastatkovaja dakładnaść ukrainskich BPŁA ŭ spałučeńni z adnosna małoj vahoj bojehałoŭki. Tak, 5 śniežnia dronam nie ŭdałosia całkam razburyć ni adzin bambavik i navat sarvać ataku hetych bambavikoŭ pa celach va Ukrainie (Minabarony RF śćviardžaje, što drony byli źbityja SPA aeradromaŭ, a na celi ŭpali tolki ich abłomki, ale nijakich paćviardžeńniaŭ hetamu niama).
U lubym vypadku takija BPŁA nie mohuć stać zamienaj dalnabojnym balistyčnym rakietam ATACMS dla reaktyŭnych sistem załpavaha ahniu HIMARS, pastavak jakich z Zachadu dabivałasia Ukraina. Rakiety nie byli pastaŭlenyja, pakolki ŭłady ZŠA, pa ŭłasnym pryznańni, aścierahalisia, što ŭdary pa celach u hłybini RF vykličuć niekantralujemuju eskałacyju kanfliktu. ATACMS maje vielmi vysokuju dakładnaść i bajavuju častku vahoj 560 kiłahramaŭ.
Pry hetym nie davodzicca sumniavacca, što Ukraina zrobić usio, kab atrymać u svajo rasparadžeńnie ŭdarnyja srodki dla paražeńnia celaŭ u rasijskim tyle.
Tak, varta čakać źjaŭleńnia na ŭzbrajeńni USU anałahaŭ iranskich dronaŭ Shahed-136 — dla hetaha ŭ krainy jość usie techničnyja mahčymaści. Takija bieśpiłotniki značna tańniejšyja, čym ciažkija reaktyŭnyja BPŁA, i dobra dapaŭniajuć ich padčas masiravanych udaraŭ.
Ale navat kali ŭkrainskija ŭdary i nie naniasuć Rasii surjoznaha vajennaha ŭronu, jany prymusiać US RF marnavać resursy na ich adbićcio: rasijskaj armii daviadziecca prykryvać z dapamohaj SPA nie tolki liniju frontu i miažy z Ukrainaj, ale i hłyboki tył.
Anałahičnaj mety svaimi stratehičnymi bambardziroŭkami sprabuje dabicca va Ukrainie i rasijskaje kamandavańnie. Ciapier USU pakazali, što mohuć adkazać simietryčna (chaj i ŭ mienšych maštabach).
Čytajcie taksama:
«Aplavucha Rasii, supastaŭnaja z vybucham na Krymskim moście». Analityk prakamientavaŭ ataki na rasijskija vajskovyja aeradromy
The Washington Post: Rasijskija aeradromy atakavanyja ŭkrainskimi bieśpiłotnikami — vielmi efiektyŭnymi
