Siłaviki zajavili, što bolš nie buduć publikavać źnievažalnyja videa z zatrymanymi za palityku
Kanał siłavikoŭ, jaki publikavaŭ videa z zatrymanymi na fonie dźviarej, anansavaŭ, što «źmianiaje farmat publičnaj padačy infarmacyi».
Jany zajaŭlajuć, što takich videa bolš nie budzie.
«Dakładniej buduć, ale nie pa 5 na dzień, a tolki z realna nieabchodnych nahod. My ličym, što bolš čym za 2 hady sens našaha pasłańnia dajšoŭ da adrasataŭ, a farmat zžyŭ siabie svajoj nieaktualnaściu», — napisaŭ kanał.
Łukašysty tłumačać heta tym, što biełarusam nibyta ŭžo nie cikavyja piersanalii zatrymanych. Ale što nasamreč za hetym staić, pakul ciažka skazać. Chutčej heta palityčnaje rašeńnie, abstaviny jakoha nam nie viadomyja.
Pry hetym źmianšeńnia kolkaści aryštaŭ naŭrad ci prychodzicca čakać. Prynamsi siłaviki pišuć, što praca pa vyjaŭleńni «ekstremistaŭ» nie spynicca.
Usiaho ŭ Biełarusi z 2020 hoda zaviedziena da 12 tysiač palityčna matyvavanych kryminalnych spraŭ, ich fihurantami stali dziasiatki tysiač ludziej.
Nie mienš za 50 tysiač čałaviek prajšli praz administracyjnyja zatrymańni. Dakładnyja ličby nieviadomyja.
Z prapahandy, jakoj supravadžajucca represii, vynikaje, što łukašenkaŭcy pomściać za 2020 hod i chočuć dabicca, kab biełarusy bolš nikoli nie patrabavali svabodnych vybaraŭ i prava naroda samomu vybirać uładu.
Takich masavych represij za apošnija paŭstahodździa nie viedała nivodnaja kraina Jeŭropy.
