5 tysiač dziaciej, 16 tysiač malunkaŭ, 15 tysiač jeŭra. Jak pracuje biełaruski prajekt Leleka, stvorany ŭ padtrymku dziaciej z Ukrainy
Z sakavika 2022 hoda kamanda vałancioraŭ pieravažna ź Biełarusi pačała stvarać dabračynny prajekt Leleka, jaki dapamahaje ŭkrainskim dzieciam zarabić na svajoj tvorčaści. Suzasnavalnica prajekta Alaksandra Łamačenka raskazała dla Radyjo Unet, jak pracuje płatforma i kolki hrošaj dzieci z Ukrainy ŭžo zmahli atrymać za svaje malunki.
Fota: skrynšot z płatformy leleka.me
30 vałancioraŭ z pačatku sakavika pačali pracavać nad stvareńniem admysłovaj płatformy Leleka, na jakoj možna nabyć malunki dziaciej z Ukrainy. Svaju tvorčaść maleńkija mastaki dasyłajuć arhanizataram prajekta, paśla dyzajniery ŭručnuju apracoŭvajuć malunki i dalej vyjava vystaŭlajecca na prodaž. Ahułam u prajekcie paŭdzielničali ŭžo 5 tysiač ukrainskich dziaciej, jakija dasłali 16 tysiač prac.
Fota: skrynšot z płatformy leleka.me
Za raspracoŭku techničnaj častki prajekta adkazvaje Pavieł Libier. Dyzajniery apracavali ŭžo 12 tysiač malunkaŭ. U kamandzie taksama jość markietołahi, jakija redahujuć teksty dziaciej, jakimi aŭtary supravadžali svaje malunki. A taksama kamanda pastajanna šukaje kanały prodažu rabot: kab dzieci mahli zarabić jak maha bolš.
Naprykład, pad Kalady na sajcie etsy.com zapuścili prodaž naboraŭ śviatočnych paštovak. Dla bolšaha prasoŭvańnia dziciačaj tvorčaści płanujecca rabić i inšyja fizičnyja pradukty z malunkami.
Ukrainskija dzieci z dapamohaj prajekta ahułam zmahli zarabić 15 tysiač jeŭra. Usie hrošy ad prodažu biez VAT i płaciežnaj kamisii partnioraŭ pieraličany niepasredna na bankaŭski rachunak baćkoŭ dzietak. Sam prajekt nie biare kamisii i źjaŭlajecca poŭnaściu vałanciorskim.
«Dzieci, jakija ŭdzielničajuć u prajekcie, adčuvajuć siabie patrebnymi, što jany mohuć taksama niešta zrabić. Dziela hetaha my i stvaryli prajekt. Ale časta svaje hrošy dzieci dalej adpraŭlać na dabračynnaść», — padkreślivaje Alaksandra Łamačenka.
75—80 % mastakoŭ, jakija dasyłajuć svaje malunki — heta dzieci, jakija znachodziacca va Ukrainie. Samamu maleńkamu ź ich 8 miesiacaŭ. Ale dasyłajuć svaje pracy pačatkoŭcy roznaha ŭzrostu, u roznych stylach i z roznymi siužetami. Dla zručnaści na sajcie vyjavy raźbityja pa katehoryjach, i možna abrać malunki tolki, naprykład, z čyrvonym koleram, ci z žyviołami, ci namalavanyja ŭ peŭnaj technicy.
Alaksandra Łamačenka adznačaje, što ŭ prajekta jość try katehoryi pakupnikoŭ. Najpierš heta žychary krain-susiedak Ukrainy, jakija dobra viedajuć situacyju i chočuć niepasredna padtrymać jaje žycharoŭ. Druhaja katehoryja — heta pakupniki z ZŠA, Francyi, Vialikabrytanii i inšych krain Zachodniaj Jeŭropy, jakija ŭžo bolš uvažliva vybirajuć malunki, razdrukoŭvajuć ich pad peŭnyja mety, naprykład, kab upryhožyć svoj dom. Taksama płatformaj Leleka karystajucca kamiercyjnyja kampanii, kab stvaryć kreatyŭny mierč.