U centry Minska pradajecca kvatera ź vielmi dziŭnaj vannaj-basiejnam. Ale takija tut u kožnym padjeździe
Hety piacipaviarchovy dom nasuprać Vialikaha teatra opiery i baleta byŭ pabudavany ŭ 1936 hodzie. Pieršapačatkova kvatery ŭ domie na skryžavańni vulic Bahdanoviča i Staražoŭskaj atrymlivali čyrvonyja kamandziry i namienkłaturnyja rabotniki. Siońnia dom znakamity nie tolki svajoj historyjaj, ale i niezvyčajnymi architekturnymi rašeńniami.
Ciapier tut pradajecca trochpakajovaja kvatera ź niezvyčajnaj vannaj-basiejnam, raskazvaje Realt.by.
Padčas vajny z elitnym domam adbyłasia trahiedyja — u pabudovu trapiła bomba, ad jakoj zahinuła bolš za 100 čałaviek. Adnak užo ŭ 1947 hodzie budynak adnavili pałonnyja niemcy. Kvatery ŭ adrestaŭravanym domie znoŭ razdali pradstaŭnikam minskaj elity — kiraŭnikam pradpryjemstvaŭ, rabotnikam kultury.
U budynku pieršapačatkova było piać padjezdaŭ, čatyry ź ich byli zasielenyja pradstaŭnikami namienkłatury, a piaty — pamočnikami pa haspadarcy: šafiorami i chatnimi rabotnicami, jakija absłuhoŭvali namienkłaturu. Praz heta ŭ padjezdach — roznyja płaniroŭki kvater. U elitnych «paradnych» možna znajści prastornyja troch— i čatyrochpakajovyja kvatery, a ŭ padjeździe «dla čeladzi» — tolki nievialikija dvuchpakajoŭki.
Jašče adna «słavutaść» doma — mini-basiejny ŭ kožnaj kvatery. Kažuć, pry budaŭnictvie budynka prajekciroŭščyki nie zmahli znajści čyhunnyja vanny, tamu vyrašyli zrabić «kupalni» hruntoŭnymi − z cemientu i žalezabietonnych belek, utapiŭšy kanstrukcyju ŭ padłohu.
U vyniku, u kožnaj kvatery źjavilisia svaje mini-basiejny. Dla taho, kab spuścicca ŭ vannu, tut praduhledžana śpiecyjalnaja prystupka. Praŭda, tak jak paviercham vyšej znachodzicca dakładna takaja ž kanstrukcyja, źvierchu pravisaje «basiejn» susieda.
Pieršapačatkova vanny nie byli abkładzieny plitkaj. Heta było zroblena tolki padčas kapramontu ŭ 70-ch hadach. Kažuć, karystacca takimi basiejnami zručna — tolki vadu nabirać davodzicca doŭha.
Ciapier u domie, jaki źjaŭlajecca historyka-kulturnaj kaštoŭnaściu, pradajecca adna kvatera.
Na prodaž vystaŭlena trochpakajovaja kvatera płoščaj 74 kvadratnyja mietry.
Raźmiaščajecca žyllo na čaćviortym paviersie. U kvatery — niadrenny ramont, vysokija stoli i vialikija vokny. Mini-basiejn tut taksama prysutničaje!
Košt troški pobač ź Niamihaj, Trajeckim pradmieściem i nabiarežnaj Śvisłačy — 150 tysiač dalaraŭ.