Šolc: Nielha dazvolić Pucinu padzialić śviet na błoki i śfiery ŭpłyvu
Kancler Niamieččyny Ołaf Šolc u artykule dla časopisa Foreign Affairs pieraściaroh ad novaj chałodnaj vajny praz padzieł śvietu na błoki i zaklikaŭ nakiravać namahańni na stvareńnie novych partniorstvaŭ, piša RBK.
Fota: Michael Sohn / AP
«Žorstki napad Rasii na Ukrainu ŭ lutym 2022 hoda staŭ pačatkam pryncypova novaj realnaści […] kali Pucin addaŭ zahad ab napadzie, jon razburyŭ jeŭrapiejskuju i mižnarodnuju architekturu śvietu, na stvareńnie jakoj syšli dziesiacihodździ. [ … ] Dziejničajučy jak impierskaja dziaržava, Rasija siońnia imkniecca siłaj pierakroić miežy i znoŭ padzialić śviet na błoki i śfiery ŭpłyvu», — piša Šolc.
Pavodle jaho słoŭ, śviet nie pavinien dazvolić rasijskamu prezidentu damahčysia svaich metaŭ, a «revanšyscki impieryjalizm Rasii pavinien być spynieny».
«Vyrašalnaja rola Hiermanii ŭ ciapierašni momant zaklučajecca ŭ tym, kab stać adnym z asnoŭnych pastaŭščykoŭ biaśpieki ŭ Jeŭropie, inviestujučy ŭ našy uzbrojenyja siły, umacoŭvajučy jeŭrapiejskuju abaronnuju pramysłovaść, uzmacniajučy našu vajennuju prysutnaść na ŭschodnim fłanhu NATA, a taksama navučajučy i asnaščajučy ŭzbrojenyja siły Ukrainy».
Dziejańni NATA, pa słovach Šolca, nie pavinny pryvieści da pramoj kanfrantacyi z Rasijaj, ale aljans pry hetym pavinien strymlivać dalejšuju rasijskuju ahresiju.
«Naša pasłańnie Maskvie hranična jasnaje: my poŭnyja rašučaści abaraniać kožny santymietr terytoryi NATA ad luboj mahčymaj ahresii», — zajaviŭ niamiecki kancler.
